Janseıit Túımebaev Tatarstannyń Memlekettik keńes tóraǵasymen kezdesti
Kezdesý barysynda Qazaqstan men Tatarstan arasynda ultaralyq kelisim men memleketaralyq baılanysty nyǵaıtý máseleleri sóz boldy. Sondaı-aq, joǵary mártebeli meıman Beıbitshilik jáne kelisim saraıy men QHA etnomádenı birlestikteriniń jumysymen tanysýǵa, tájirıbe almasýǵa múddelilik bildirdi.
Eki el arasyndaǵy mádenı-gýmanıtarlyq baılanystyń mańyzdylyǵyna mán artqan Janseıit Qanseıituly Qazaqstan men Tatarstannyń Reseımen strategııalyq seriktestiktiń aıasynda jańa sapaly deńgeıge kóshkenin atap ótti. «Qazaqstan men Tatarstan ózara tarıhı jáne mádenı turǵyda bir-birimen tyǵyz baılanysty. Birneshe ǵasyrlar boıy qazaqtardyń tarıhy tatarlarmen qosa órilip, órbip otyrǵanyn aıta ketý kerek. Sondyqtan, bizdiń elimizde etnıkalyq tatarlar kópultty Qazaqstannyń belsendi bóligi bolyp sanalady», - dedi J.Qanseıituly.
Qazaqstan aýmaǵynda ózge etnostar sekildi tatarlardyń da ulttyq merekeleri keń kólemde atalyp ótiledi. Aımaqtardaǵy barlyq etnomádenı ortalyqtardyń janynda tatar tilin, mádenıetin dáripteý maqsatynda jeksenbilik mektepter jumys jasaýda. Oral qalasynda Tatarstan Respýblıkasynyń qoldaýymen tatardyń birtýar uly Ǵ.Toqaı atyndaǵy ortalyq pen mýzeı ashyldy. Tatar tilinde «ıAshlek» merzimdi baspasózi turaqty shyǵyp keledi. 2018 jyly «Novyı vek» tatar spýtnıktik telearnasynyń tilshilik qosyny ashyldy.
2010 jyly Qazaqstan halqy Assambleıasy men Tatarstan halqy Assambleıasy arasynda yntymaqtastyq jónindegi Kelisimge qol qoıylǵan bolatyn. Janseıit Qanseıituly Tatarstan halqy Assambleıasynyń Tóraǵasy Farıd Mýhametshınge yntymaqtastyq aıasynda júzege asyrylatyn birlesken jobalardy talqylaýdy usyndy. Ol tatarstandyq áriptesin 2020 jyldyń aqpan aıynda Almaty qalasynda Tatarlar men bashqurttardyń qazaqstandyq Kongresi tarapynan uıymdastyrylatyn tatar mádenıetiniń festıvaline qatysýǵa shaqyrdy. Sondaı-aq, Qazaqstan halqy Assambleıasynyń túrli etnostardyń óz tarıhı otandastarymen birlesken jobalarynyń kórmesi men Halyqaralyq bıznes forýmǵa Tatarstan bıznesmenderiniń de qatysýyna muryndyq bolýyn surady.
«Jastar jyly aıasynda jáne Assambleıanyń 25-jyldyǵyna baılanysty QHA-nyń «Jańǵyrý joly» respýblıkalyq jastar qozǵalysynyń uıymdastyrýymen kóptegen is-sharalar ótýde. Bizdiń jastarymyz Tatarstan halyq Assambleıasynyń jastar qanatymen yntymaqtastyqta birlesken jobalardy júzege asyrýǵa ázir. Sondaı-aq, eki eldiń rýhanı qundylyqtary da ortaq. Bizdi Uly Abaı Qunanbaev pen Ǵabdolla Toqaı biriktiredi. Osyǵan baılanysty Abaıdyń 175 jyldyǵyn atap ótý aıasynda yntymaqtastyq pen ózara mádenı baılanysty nyǵaıtýdy usynamyn», - dedi J.Qanseıituly.
Aıta ketý kerek, búgingi tańda Qazaqstanda 201,5 myń tatar ultynyń ókili turady. El aýmaǵyndaǵy barlyq tatar-bashqurt etnomádenı birlestikteri «Tatarlar men bashqurttardyń qazaqstandyq Kongresi» respýblıkalyq qoǵamdyq birlestigine biriktirilgen.
