Janseıit Túımebaev: «Safari Shardara» jobasy dástúrge aınalýy tıis
TÚRKІSTAN. QazAqparat - Búgin Túrkistan oblysynyń Shardara aýdanynda ótken halyqaralyq «Safari Shardara» sharasynda sporttyq saıystar men kontserttik baǵdarlamalar qatar uıymdastyryldy, dep habarlaıdy QazAqparat tilshisi.
Festıvalde alǵash bolyp sóz alǵan oblys ákimi Janseıit Túımebaev aıtýly sharanyń óńirde tuńǵysh ret uıymdastyrylyp jatqanyn tilge tıek etip, saıysqa qatysýshylar men qonaqtardy quttyqtady.
«Elbasymyz «Baı tabıǵatymyz ben mádenı áleýetimizdi paıdalaný úshin syrttan keletin jáne ishki týrızmdi damytýǵa erekshe kóńil bólý qajet» dep atap ótkendeı, bolashaqta Qazaqstanda týrızm óńirlik qana emes, jahandyq sıpat alýy kerek. Búgin bastalǵan «Safari Shardara» festıvali - kórshi elderge Qyzylqum men Shardara sý qoımasynyń jaǵalaýy syndy jaýharlarymyzdy tanytatyn shara bolmaq. Sondaı-aq, biz osy is-shara arqyly shaǵalaly Shardarada jelkendi qaıyq sporty men at pen túıe jarys, qusbegilik syndy ulttyq sport túrleri men ózge de ata kásipterimizdi jańǵyrtýdy kózdep otyrmyz. Munyń barlyǵy óńirdegi týrızmdi damytyp, bıznes axýaldy kóterýge baǵyttalǵan», - dedi Janseıit Túımebaev.
Sonymen qatar, oblys basshysy óńirde buǵan deıin Túlkibas aýdanynda ótken «Qyzǵaldaq», Báıdibek aýdanynda ótken «Qymyzmuryndyq», Jetisaıdaǵy «Qaýynfest» festıvaldarynyń mańyzdylyǵyna toqtaldy.
«Aýqymdy is-sharalar arqyly aýdannyń bolashaǵy úshin mańyzdy brendterin elge áıgili etýdi maqsat tuttyq. Bıyl ıgi bastamalardy bastap berdik, endi isker jigitter, jergilikti kásipkerler, aýdannyń atpal azamattary osy oılardy jalǵastyryp áketip, ary qaraı dástúrli sharaǵa aınaldyrýy tıis»,- dedi Janseıit Túımebaev.
Shara aıasynda oblys ákimi saıysta úzdik shyqqan birqatar sportshylardy marapattap, syı-syıapat jasady. Festıval barysy «djıp» kólikteriniń jarysymen jalǵasyp, qumda kompozıtsııalyq ROCK RACING shoýy kórsetildi.
Dúbirli jarys túıeler saıysymen qyza tústi. Onda 15 túıeshi baq synap, ózara myqtyny anyqtady. Túrkistan óńiriniń týrıstik áleýetin arttyrýǵa arnalǵan halyqaralyq shara kontserttik baǵdarlamamen aıaqtaldy.
