Janseıit Túımebaev: Prezıdent Joldaýy Elbasy strategııasymen sabaqtas
Onyń aıtýynsha, «Jańa jaǵdaıdaǵy Qazaqstan: is-qımyl kezeńi» Joldaýy - reformalar týraly Joldaý. Prezıdentke tikeleı baǵynatyn Strategııalyq josparlaý jáne reformalar agenttigi, Reformalar jónindegi Joǵarǵy Prezıdenttik Keńes - memlekettik basqarýdyń tutas salasyna aınalýda, bul olardy tereń zertteýdi qajet etedi.
«Prezıdent Qasym-Jomart Toqaev eldiń áleýmettik-ekonomıkalyq damýyn sapaly jańa deńgeıge jetkizý boıynsha is-qımyldardyń tutas strategııasyn aıqyndady. Olar áleýmettik ádilettilik, tıimdilik pen básekege qabilettilik sharttaryna negizdelgen. Qoǵam ómiriniń barlyq salalary tereń reformalaýdy qajet etedi – olar ekonomıka, áleýmettik sala jáne eldiń saıası ómiri. Reformalaýdyń tásili men prıntsıpi ózgerýde. Zańnyń ústemdigi, adam men azamattardyń quqyqtaryn saqtaý memlekettik basqarýdyń jańa modeli arqyly júzege asyrylady. Al negizgi ekpin jergilikti ózin-ózi basqarýdy damytýǵa aýdarylady. Bul - azamattardyń ózderin tikeleı tolǵandyratyn máselelerin sheshýge qatysýǵa degen múmkindikter»,– dedi Janseıt Túımebaev.
Sonymen qatar, ol Memleket basshysynyń Joldaýy Elbasy Nursultan Nazarbaevtyń saıasatymen sabaqtastyǵyn kórsetetinin atap ótti.
«Joldaý «Ulttyń jańa sapasy» bólimi «Rýhanı jaǵyrý» baǵdarlamasymen naqty baılanysty. Qoǵamdyq sanany jańǵyrtýdyń jańa baǵyttary aıqyndalǵan: «Jaýapty memleket - jaýapty qoǵam - jaýapty adam». Bizdiń árqaısymyz aldaǵy reformalardyń qurylymdyq kúrdeliligi men tereńdigi úshin Qazaqstannyń revolıýtsııalyq emes, bir mándi evolıýtsııalyq damýy qajet ekenin túsinýimiz kerek»,– dedi ol.
Sondaı– aq, ol respýblıkalyq etnomádenı birlestik jetekshilerine birqatar baǵyt boıynsha jumystardy uıymdastyrýdy tapsyrdy.
«Bizdiń mindetimiz - osy mańyzdy qujatty túsindirýge jáne iske asyrýǵa belsendi qatysý. Respýblıkalyq etnomádenı birlestikterdiń basshylarynan óz birlestikteriniń belsendilerimen kezdesýler ótkizýdi, Joldaýdy túsindirýge jáne iske asyrýǵa qatysý máselelerin talqylaýdy tapsyramyn. BAQ redaktorlary halyqqa Joldaýdyń mindetteri, sondaı-aq olardy júzege asyrý boıynsha belsendi túsindirý jumystaryn júrgizýi kerek. Etnıkalyq buqaralyq aqparat quraldarynyń resýrstary osy qyzmetke barynsha belsendi atsalysýy tıis»,– dedi Qazaqstan halqy Assambleıasy tóraǵasynyń orynbasary J.Túımebaev.
Onyń aıtýynsha, etnomádenı birlestikter halyqty mıkrobıznes negizderine oqytý salasynda jobalar ázirlep, júzege asyra alady.
«Biz birqatar joba ázirlep jatyrmyz. Atap aıtar bolsam, aýylda ómir súrý sapasyn jáne jumyspen qamtýdy jaqsartý aıasynda biz «Ár aýyldyń óz sheberleri» atty oqytý jobasyn bastaımyz. Bul aýyldaǵy eń ótkir máselelerdi sheshýge baǵyttalǵan «Aýyl - el besigi» baǵdarlamasynyń mindetterine tolyq jaýap beredi. Otbasy - qoǵamnyń bólshekteri. Sondyqtan «Otbasylyq bıznes - ál-aýqat negizi» jobasy pysyqtalatyn bolady. Sonymen qatar, bizde kópultty otbasylar boıynsha joba júzege asyrylady. Jalpy, qazir ádettegi jumys formatynan naqty nátıjeleri bolatyndaı jobalarǵa kóńil bóli óte mańyzdy,– dep qortyndylady spıker.
