Janseıit Túımebaev Ózbekstannyń úsh oblys ákimimen memorandýmǵa qol qoıdy
ASTANA. QazAqparat - Qazaqstan Respýblıkasynyń Prezıdenti Nursultan Nazarbaevtyń Ózbekstan Respýblıkasyna memlekettik saparynyń aıasynda mańyzdy kelissózder júrgizilip, birqatar kelisimderge qol qoıyldy. Ózbekstan elimen shekaralas Ońtústik Qazaqstan oblysy úshin de bul sapardyń orny erekshe boldy. Sondyqtan da qazaqstandyq resmı delegatsııanyń quramynda OQO ákimi Janseıit Túımebaevta qatysty, dep habarlaıdy óńirlik ákimdiktiń baspasóz qyzmeti.
Búginde Qazaqstan men Ózbekstan arasynda áriptestik baılanys arta tústi. Máselen, bıyldyń ózinde beketter ashylyp, eki eldiń arasynda jańadan poıyz ben avtobýstar qatynap, kedendegi birqatar aktsızdik tólem alynyp tastaldy.
Bul jolǵy Memleket basshysynyń jumys sapyrynda da 10 mańyzdy qujatqa qol qoıyldy. Sonyń ishinde Ońtústik Qazaqstan oblysynyń ákimi Janseıit Túımebaev pen Tashkent oblysynyń hokımy Babaev Shýkýrýllo, Syrdarııa oblysynyń hokımy Oıbek Ashýrmatov jáne Djızak oblysynyń hokımy Ismolılov Saıfýddınderdiń arasynda saýda-ekonomıkalyq jáne mádenı-gýmanıtarlyq salalardaǵy ózara túsinistik týraly memorandým túzildi.
Sonymen qatar, Elbasynyń kórshi elge jasaǵan sapary aıasynda uıymdastyrylǵan eki el kásipkerleriniń qatysýymen qazaq-ózbek bıznes-forýmy ótti. Baýyrlas elderdiń saýda-ekonomıkalyq yntymaqtastyǵynyń artýyna múmkindik beretin kezdesýge qazaqstandyq 300-den astam kásipker qatysty. Іskerlik kezdesýge Ońtústik Qazaqstan oblysynan óńir basshysy bastaǵan 150-den astam kásipker qatysty.
Eki eldiń ǵasyrdan beri jalǵasqan dostyq qarym-qatynasy jandanǵan iskerlik jıynda OQO kásipkerleri men ózbekstandyq bıznesmender arasynda saýda-ekonomıkalyq týraly 7 yntymaqtastyq memorandýmyna qol qoıyldy. Sondaı-aq, Qazaqstan boıynsha quny 1,2 mlrd AQSh dollaryn quraıtyn birneshe kelisimder túzildi. Sondaı tıimdi kelisimderdiń birine elimizdegi 200-den astam dári-dármek shyǵarýmen aınalysatyn «Hımfarm» aktsıonerlik qoǵamy qol jetkizdi. Eldegi osy saladaǵy jetekshi kásiporyn buǵan deıin kórshi Qyrǵyzstan Ázerbaıjan, Túrkimenstan, Monǵolııa syndy elderge óz ónimderin eksporttap kelgen bolsa, endi mine Ózbekstanǵa óz ónimin shyǵarmaq.
Aıta keteıik, jyl basynan beri Ońtústik Qazaqstan oblysynyń ákimi Janseıit Túımebaev kórshi elmen qarym-qatynasty kúsheıtý maqsatynda birqatar kelissózder júrgizip, iskerlik jıyndar ótkizdi. Máselen, Elbasynyń tapsyrmasyna sáıkes transshekaralyq Ógem ózeninen sýdy birigip paıdalaný maqsatynda Ózbekstan memleketimen kelissózder júrgizilip, aýyz sý bólip alýǵa kelisim jasaldy. Nátıjesinde, aldaǵy bes jylda Ońtústik Qazaqstan oblysynyń 700 myńǵa tarta halqy bar úsh aýdany sapaly aýyz sýmen qamtamasyz etiletin bolady.
Ózbekstan kúngeı kásipkerleri úshin 32 mıllıondyq tutynýshysy bar eń jaqyn naryq. Sondyqtanda taýar aınalymyn arttyryp, kásipkerlikti birlese damytý maqsatynda naýryz aıynda J.Túımebaev bastaǵan ońtústikqazaqstandyq delegatsııa Ózbekstanǵa resmı saparmen barǵan-dy. Nátıjesinde mamyr aıynda Tashkent taýar óndirýshileriniń kórmesi Shymkentte uıymdastyrylyp, oǵan 200-deı kásiporyn óz ónimderin usyndy.
Eki eldiń qarym-qatynasyn jaqsartý maqsatynda naýryz aıynda «Almaty-Tashkent» jáne «Samarqand-Tashkent-Astana» baǵytyndaǵy alǵashqy poıyz jolǵa shyqty. Budan bólek, shilde aıynda Tashkent-Termez avtojoly men «Syrdarııa» ótkizý beketi ashyldy.
