Janseıit Túımebaev ońtústiktiń úzdik agrarshylaryn marapattady
ASTANA. QazAqparat - Búgin Ońtústik Qazaqstan oblysynda alǵash ret «AGROFEST-2017» aýyl sharýashylyǵy festıvali ótti, dep habarlaıdy QazAqparat óńir basshysynyń baspasóz qyzmetine silteme jasap.
Agrarly aımaqtyń sharýalary memlekettiń qoldaýymen jáne tynymsyz eńbektiń arqasynda bıyl egis naýqanyn jaqsy kórsetkishpen aıaqtady. Merekelik sharaǵa aýyl sharýashylyǵy salasynyń ardagerleri, eńbek ozattary, kásipkerler, halyq qalaýlylary men sala mamandary bastaǵan jalpy 8 myńǵa jýyq adam qatysty.
Oblys ákimi Janseıit Túımebaev bastaǵan festıval qonaqtary aldymen, aýyl sharýashylyǵy salasynyń jetistikterin aıshyqtaıtyn kórmemen tanysyp shyqty. Kórmede halyqtyń nazaryna aýyl sharýashylyǵy ónimderi, asyl tuqymdy tórt túlik maldyń túrleri men ozyq tehnıkalar usynyldy. Festıval aıasynda aýyl sharýashylyǵy ónimderiniń jármeńkesi uıymdastyryldy. Jármeńkede oblystyń barlyq aýdandarynan jınalǵan jalpy kólemi 182 tonna tabıǵı taza ónimder naryqtaǵy baǵadan 15-20 paıyzǵa arzan baǵamen usynyldy. 
Óńir basshysy jyl boıyna tynymsyz eńbek etken aýyl sharýashylyǵy salasynyń qyzmetkerlerin kásibı merekelerimen quttyqtap, atalǵan salada belsendilik tanytyp, úzdik kórsetkishke qol jetkizgen sharýalar men aýdandardy marapattady. Óńir sharýalary «Ozat astyq jınaýshy», «Ozat mal bordaqylaýshy», «Ozat baqsha ósirýshi» syndy 27 nomınatsııa boıynsha marapatqa ıe bolsa, aýdan-qalalar arasynda 15 baǵyt boıynsha úzdikter anyqtaldy.
«Oblysymyzdaǵy aýyl sharýashylyǵy eksportynyń kólemi búgingi tańda 211,4 mln. AQSh dollaryn qurap, ótken jylmen salystyrǵanda 6 paıyzǵa ósti. Import kólemi 320 mln. AQSh dollaryna jetip, 4 paıyzǵa kemidi. Osylaısha respýblıkada oblystyń úlesi 13 paıyzǵa jetip otyr. Aǵymdaǵy jyly mal sharýashylyǵy salasynyń eńbekkerleri de tolaǵaı tabystarǵa qol jetkizgenin baıqaýǵa bolady», - dedi Janseıit Qanseıituly.
Festıval munan soń ortalyq atshabardaǵy qyz qýý, teńge ilý, aýdaryspaq, qazaq kúresi syndy ulttyq sporttyń 12 túrinen saıystarǵa ulasty. Túrli aýdandardan jınalǵan bilektiler ózara myqtylardy anyqtady. Úzdik atanǵan barlyq qatysýshylar men sportshylarǵa baǵaly syılyqtar tabys etildi. Mereke aıasynda 16 kıiz úı tigilip, festıval qonaqtaryna arnap ulttyq taǵamdar men sýsyndardan dastarhan jaıyldy. Merekelik shara sońy oblystyq óner juldyzdarynyń gala kontsertine ulasty. 
