Janseıit Túımebaev oblys turǵyndarymen birge shańǵy tepti
TÚRKІSTAN. QazAqparat - Túrkistan oblysynyń ákimi Janseıit Túımebaev Tólebı aýdanynda ótken «Taý samaly - Jan samaly» festıvalinde shańǵy tepti. Demalys aımaǵyna kelgen aımaq basshysy taýdan úsh ret shańǵymen tústi, dep habarlaıdy QazAqparat tilshisi.
Festıval barysynda oblys turǵyndarymen kezdesken J.Túımebaev jurtshylyqty toı-tomalaqtan bir sát demalyp, buqaralyq sportpen shuǵyldanýǵa shaqyrdy.
«Kez kelgen oblys osyndaı tabıǵatpen, demalys aımaǵymen maqtana almaıdy. Al, oblysymyzdaǵy Taýsamaly, Qasqasý sııaqty demalys oryndary - bizdiń baılyǵymyz. Endeshe, osy baılyǵymyzdy baǵalaıyq. Meniń aıtarym, azamattar, qyzmetkerler, bala-shaǵalaryńyzdy alyp, osy jerge kelińizder. Demalyp, taý shańǵysymen syrǵanańyzdar», - dedi Janseıit Túımebaev.
Tilshilerge suhbat bergen oblys ákimi, sondaı-aq Jańa jyldy qaıda qarsy alatynyn da aıtyp berdi. Onyń sózinshe, 31 jeltoqsan kúni Túrkistan qalasynyń ortalyq alańyndaǵy Jańa jyl keshine qatysyp, qalǵan ýaqytty otbasymen ótkizýdi josparlap otyr.
