Janseıit Túımebaev Moldova elshisimen kezdesti

NUR-SULTAN. QazAqparat – Qazaqstan halqy Assambleıasy tóraǵasynyń orynbasary Janseıit Túımebaev Moldova Respýblıkasynyń Qazaqstan Respýblıkasy men Reseı Federatsııasyndaǵy Tótenshe jáne ókiletti Elshisi Andreı Negýtsamen kezdesti, dep habarlaıdy QazAqparat tilshisi.

Elshi Nur-Cultan qalasyndaǵy Dostyq úıi men QHA etnomádenı birlestikterdiń qyzmetimen tanysty.

QHA Tóraǵasynyń orynbasary assambleıa tarıhyn baıandady jáne 2007 jyldan beri joǵarǵy zańnamalyq organǵa 9 depýtat saılaıtyn konstıtýtsııalyq quqyq ıelengenin atap ótti.

Qazaqstanda jalpy sany 1025 etnomádenı birlestik, 40 Dostyq úıi jumys isteıdi. Otbasynda toleranttylyqty sińirý úshin barlyq óńirde Qoǵamdyq kelisim keńesteri men Analar keńesi qurylǵan. 209 mektepte ulttyq oqytý tili qoldanylady, onyń ishinde 24 mektep ózbek, uıǵyr, tájik tilderinde tolyq oqytady jáne 139 mektep aralas tilde bilim beredi.

Orys, uıǵyr, koreı, nemis, ózbek teatrlary jemisti eńbek etýde. Uıǵyr, káris jáne nemis teatrlary 2017 jyly akademııalyq dáreje aldy. Odan bólek, Qazaqstanda etnomádenı birlestikterden 52 BAQ 15 tilde tirkelgen.

«Qazaqstanda 15 myńǵa jýyq moldovan beıbitshilik pen kelisimde ómir súrip keledi. Biz olardyń tili men mádenıetin qurmetteımiz. Jeksenbilik mektepter men úıirmelerde jınalyp, óz tili men salt-dástúrlerin damyta alady», - dedi J. Túımebaev.

Óz kezeginde elshi A.Negýtsa Qazaqstandaǵy moldavııalyq dıasporanyń memlekettik saıasatty qoldaıtynyn jáne olarǵa bar jaǵdaı jasalǵanyn atap ótti.

«Qazir Moldova dıasporasy bıýrosynyń jetekshisi baıqaýy aıaqtalyp qaldy, bul - Moldova úkimeti janyndaǵy agenttik. Munda jetekshimen birge bıýronyń tutas erejesi ózgeredi. Dál osy bıýro kóp septigin tıgizedi dep oılaımyn», - dedi A. Negýtsa.

Onyń aıtýynsha, Moldova men Máskeýden shyǵarmashylyq tulǵalardy shaqyrý arqyly Qazaqstandaǵy moldavııalyq dıasporamen mádenı baılanysty arttyrý josparlanyp otyr.

QHA baspasóz qyzmetiniń habarlaýynsha, qazirgi ýaqytta Qazaqstanda 500-ge jýyq rýmyndyqtar men 15 myń moldovandar turady.

Qazaqstandaǵy rýmyn-moldovan qaýymdastyǵy 2002 jyly Almaty qalasynda qurylǵan. Qaýymdastyq quramyna moldovalyq «Strýgýrash» mádenı ortalyǵy (Almaty qalasy), «Dakıa» rýmyn mádenı qoǵamy» QB (Qaraǵandy oblysy) jáne «Býkovına» rýmyn-moldavan etnomádenı birlestigi» (Pavlodar oblysy) kiredi.