Janseıit Túımebaev Qordaıǵa QHA saparynyń qorytyndysyn jarııalady
«Búgingi tańda Qordaı oqıǵalary memlekettik organdardyń, QHA, sarapshylar men jurtshylyqtyń nazarynda tur. Kordaı oqıǵalaryn túsindirý úshin «Egemen Qazaqstan», «Kazahstanskaıa pravda» gazetterine maqalalar daıyndadyq. Odan bólek, kún tártibinde ultaralyq qatynastar salasyndaǵy memlekettik saıasatty reformalaý máselesi kóterildi», - dedi Janseıit Túımebaev elordada etnosaıasattyń ózekti máseleleri týraly dóńgelek ústel otyrysynda.
Onyń aıtýynsha, 11-14 aqpan kúnderi QHA Ǵylymı-saraptamalyq keńesiniń sarapshylar toby Qordaı aýdanyna baryp qaıtty.
«2016 jyly júrgizilgen burynǵy zertteýler birqatar problemalardy anyqtady. Bıylǵy sapar sol máselelerdiń áli bar ekenin kórsetti. Olardyń qataryna áleýmettik-mádenı oqshaýlaný, dúngen turǵyndarynyń tuıyqtalýy, jastardyń jalpyqazaqstandyq áleýmettený baǵdarlamasynan tys qalýy, memlekettik qyzmetshiler arasyndaǵy etnıkalyq teńsizdik máseleleri bar. Etnıkalyq belgileri boıynsha belgili bir áleýmettik-ekonomıkalyq jiktelý, jer men sý resýrstarynyń tapshylyǵy, kontrabanda, quqyq qorǵaý organdaryndaǵy jemqorlyq bar. Dúngen halqynyń edáýir bóligi Qyrǵyzstan men Qytaıdaǵy oqý oryndaryn qup kóredi, qyrǵyz uıaly baılanys operatorlary men orys, qyrǵyz jáne qytaı telearnalaryn kórsetetin jerseriktik spýtnıkti paıdalanady», - dep atap ótti J. Túımebaev.
QHA ókiliniń aıtýynsha, bilim berý, densaýlyq saqtaý, áleýmet, jer paıdalaný jáne eńbek qatynastary salasyndaǵy sheshilmegen problemalar memlekettik shekara mańynda jabyq etnıkalyq qaýymdastyqtyń qurylýyna ákep soqqan.
«Bul óńirde kórshi elderdiń yqpaly seziledi. Jalpy, Qordaı qaqtyǵysy yqsham otyryqshy nemese jabyq etnıkalyq toptar máselesin ashyq kórsetti. Janjaldyń sebepteri týraly naqty túsinik bar. Etnıkalyq jaǵynan jabyq qaýymdastyqtarda áleýmettik, turmystyq, eńbek jáne qylmystyq qaqtyǵystar kóbinese etnosaralyq sıpatqa ıe bolady. Kóptegen jaǵdaılarda quqyq qorǵaý organdarynyń kúdiktilerdi jedel ustaýy janjaldyń aldyn alady. Áıtpese, jınalǵan etnoáleýmettik shıelenis syrtqa shyǵady», - dedi ol.
Sonymen birge, etnosaralyq qatynastar máseleleri boıynsha jumystarǵa kóp óńirlerde jetkilikti kóńil bólinbeıdi.
«Elimizde etnosaralyq qatynastar salasyn retteıtin zań joq. «Qazaqstan halqy Assambleıasy týraly» Zań onyń qyzmetin retteıtin negizdik normalardy ǵana qamtıdy. Memlekettik jáne ulttyq saıasat salasyndaǵy ýákiletti organ – Aqparat jáne qoǵamdyq damý mınıstrliginiń Etnosaralyq qatynastardy damytý departamenti áli de tıimdi jumys istep otyrǵan joq. Assambleıanyń hatshylyǵy jáne «Qoǵamdyq kelisim» RMM memlekettik organ bolyp sanalmaıdy. Ázirge jetkilikti ókilettik joq», - dedi J. Túımebaev.
Eske salaıyq, 7 aqpan kúni Jambyl oblysynyń Qordaı aýdanyndaǵy Masanchı aýylynyń turǵyndary arasynda jappaı tóbeles boldy. QR Prezıdenti Qasym-Jomart Toqaev buzaqylyq sıpattaǵy jappaı tóbelesti aıyptap, arandatýshylar buny odan saıyn órshitkenin málimdedi.
Qordaı oqıǵasy boıynsha 120 qylmystyq is qozǵalyp, tergeý júrgizilýde.
