Janseıit Túımebaev Qazaqstandaǵy Pákistan Elshisimen kezdesti
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Pákistan Islam Respýblıkasynyń Qazaqstandaǵy Tótenshe jáne Ókiletti Elshisi Abdýl Salık Hanmen kezdesti. Kezdesý barysynda taraptar eki el arasyndaǵy ekonomıkalyq baılanys pen ózara áriptestikti talqylap, eki jaqty qarym-qatynasty damytý jóninde pikir almasty, dep habarlaıdy QazAqparat tilshisi.
Kezdesý barysynda aımaq basshysy Ońtústik óńirine qyzyǵýshylyq tanytqan elshige alǵysyn bildire otyryp, oblystyń joǵary ınvestıtsııalyq áleýetine toqtaldy. Pákistan Islam memleketi ındýstrııalyq-agrarly el sanalatynyna kóńil bólip, osy baǵyttaǵy jobalardy birlese iske asyrýdyń tıimdiligin tilge tıek etti. Pákistanda Ońtústik Qazaqstan oblysynyń mádenıet kúnderin ótkizýdi usynyp, osyndaǵy joǵarǵy oqý oryndarynan bilim alýǵa jastardy shaqyrdy.
«Ońtústik Qazaqstan oblysynyń ákimdigi ınvestıtsııalyq jobalardy iske asyrýda jan-jaqty qoldaý kórsetýge daıyn. Qazirgi tańda ákimdik áleýetti ınvestorlar úshin barlyq jaǵdaılardy jasap, qolaıly ınvestıtsııalyq klımat qurý boıynsha belsendi jumys júrgizýde. Búginde oblystyń qalalary men aýdandarynda 11 ındýstrıaldy aımaq pen 1 arnaıy ekonomıkalyq aımaq jumys isteıdi. Óńdeýshi ónerkásip baǵytyndaǵy jobalardy iske asyrýshy ınvestorlar úshin biz atalǵan aımaqtan jer ýchaskelerin bólip berýge ázirmiz», -dedi ákim.
Sondaı-aq aımaq basshysy arnaıy ekonomıkalyq aımaqta salyq pen kedendik rejımdi engizýge baılanysty jeńildikter qarastyrylǵanyn atap ótti. Búginde oblystyń eskport kólemi 1 mlrd AQSh dollaryna jetip, ımporty 1,5 mlrd. AQSh dollaryn qurap otyr. Budan bólek, óńir qoı eti men sıyr etin Iran men Qytaı elderine jáne Birikken Arab Ámirlikterine shyǵaryp keledi. Óz kezinde elshi Abdýl Salık myrza Ońtústik Qazaqstan oblysymen yntymaqtastyqty damytýǵa daıyn ekendigin aıtyp, ákim aıtqan usynysty quptady.
«Siz aıtqan barlyq usynysty qoldaımyn jáne bul baǵytta tıisti jumystardy atqaratyn bolamyn. Búginde eki ele arasyndaǵy taýar aınalymy 54,5 mln AQSh dollaryn qurap otyr, ol óte az. Bul taýar aınalym kólemi Pákistan men Ońtústik Qazaqstan oblysynyń arasynda ǵana bolatyn jaıt. Sondyqtan da ekonomıkalyq qarym-qatynasty damytýymyz qajet. Ol úshin tıisti jumystardy júrgizetin birlesken jumysshy top quryp, bıznestiń jol kartasyn ázirlegen durys»,-dedi Abdýl Salık.
Munan bólek, mártebeli meıman qos eldiń kásipkerlerine tıimdi etý úshin Ońtústik Qazaqstanmen tikeleı áýe qatynasy baılanysyn ornatý múmkindigi men vızalyq tártipti jeńildetý máselesin qarastyrýdy usyndy. Sondaı-aq, ol osy jyldyń mamyr aıynda Shymkent qalasynda pákistandyq taýar óndirýshileriniń kórmesin uıymdastyrýǵa qoldaý bildirýin surady.
Óńir basshysy barlyq aıtylǵan usynystardy qoldaıtynyn aıtyp, taýar óndirýshiler kórmesin ótkizý múmkin ekenin atap ótti.
