Janseıit Túımebaev qarttar úıindegi analardy arnaıy baryp quttyqtady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Shymkent qalasyndaǵy qarttar úıinde boldy. Onda jalǵyzbasty áıel azamattaryn 8 naýryz «Halyqaralyq áıelder kúni» merekesimen quttyqtap, syı-sııapat jasady, dep habarlaıdy QazAqparat tilshisi.
Іs-shara barysynda aımaq basshysy áıelderge qamqorlyq jasaý, kópbalaly analarǵa áleýmettik qoldaý kórsetý qashan da Elbasy nazarynan tys qalmaǵanyn jetkizdi.
«Kóktem merekesi kóńilderińizge qýanysh syılap, júzderińizge nur shashsyn. Búginde óńir turǵyndarynyń 1 mln 446 myńyn názikjandar quraıdy. Bul degenimiz elimizdegi burymdylardyń eń kóbi bizdiń oblysta degendi bildiredi. Olardyń arasynda aqyny da, jazýshysy da, ǵalymy da, tipti úıdiń de, túzdiń de jumysyn qatar alyp júrgen kásipkerler de bar. Aımaqtyń ekonomıkalyq damýyna qarakóz arýlarymyzdyń qosyp kele jatqan úlesi orasan zor dep bilemin», - dedi Janseıit Qanseıituly.
Atalǵan arnaýly áleýmettik qyzmetter kórsetý ortalyǵynda 77 áıel qyzmet alýda. 260 orynǵa shaqtalǵan mekemede jalǵyzbasty qarttar men birinshi jáne ekinshi toptaǵy múgedekter bar. Olarǵa arnaýly áleýmettik qyzmetterdiń kepildendirilgen 8 túri kórsetiledi.
Aıta keteıik, oblys boıynsha 8 myńnan astam azamat arnaýly áleýmettik qyzmettermen qamtylsa, onyń 2 myńnan astamy jalǵyzilik qarttar. Búginde jalǵyzbasty qarttardyń 121-i oblystyq jumyspen qamtýdy úılestirý jáne áleýmettik baǵdarlamalar basqarmasyna qarasty «№5 arnaýly áleýmettik qyzmetter ortalyǵynda» tolyq memleket qamqorlyǵyna alynyp, keshendi qyzmettermen qamtylýda.
Al, oblys ákiminiń orynbasary Erbol Sadyr oblystyq ardagerler úıinde bolyp, aq jaýlyqty analardy aıtýly merekemen quttyqtady.
