Janseıit Túımebaev DDU ókilderimen kezdesti
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Dúnıejúzilik densaýlyq saqtaý uıymynyń ókili, uıymnyń Qazaqstandaǵy keńsesiniń basshysy Oleg Chestnov jáne keńseniń ulttyq úılestirýshisi Saltanat Egeýbaevamen kezdesti, dep habarlaıdy QazAqparat tilshisi.
Basqosýda taraptar oblys halqynyń densaýlyǵy jáne áleýmettik ahýalyn, sondaı-aq halyqaralyq uıymmen birlese atqarylatyn sharýalardy áńgimege arqaý etti.
Aımaq basshysy qonaqtarǵa óńirdiń ekonomıkalyq jáne áleýmettik jaǵdaıyn tanystyra kele, halyqaralyq uıymdarmen birlesip jumys isteýge daıyn ekenin jetkizdi.
«Bizdiń oblys halyq sany jaǵynan Qazaqstandaǵy birinshi oryndaǵy aımaq. Demek, basqa óńirlerge qaraǵanda ońtústikte medıtsınalyq kómekke júginetin azamattardyń qatary da az emes degen sóz. Sondyqtan da memlekettiń qoldaýymen óńirimizde birqatar medıtsınalyq nysandar boı kóterýde. Endigi jerde sizder arqyly zamanaýı tehnologııany qoldana otyryp, salaýatty ómir saltyn nyǵaıta tússek», - dedi Janseıit Qanseıituly.
Sondaı-aq, oblys ákimi oqý oryndarynda Dúnıejúzilik densaýlyq saqtaý uıymynyń kafedrasyn ashýdy jáne dostastyq ortalyǵyn ashýdy usyndy. Halyqaralyq uıymmen baılanysty nyǵaıta otyryp, densaýlyq saqtaý salasyn jandandyrý joldaryn aıtty.
Óz kezeginde Oleg Chestnov ta birlese jumys isteýge daıyn ekendikterin aıta kele, arnaıy memorandým jasasýdy usyndy. Sonymen qatar, aldaǵy kúnderi oblystaǵy zertteý jumystaryn júrgizip, arnaıy jobalar daıyndaýǵa kirisetinderin atap ótti.
