Jansel Denız: Ózge elde týsam da, óz elimniń atynan Rıoǵa barý men úshin úlken qýanysh (FOTO)
ASTANA. QazAqparat - Rıo olımpıadasynda taekvondodan qazaq eliniń namysyn bir er, eki áıel sportshy qorǵaıtyny týraly osyǵan deıin aıtqan bolatynbyz. Olar - Rýslan Japarov, Aınur Esbergenova men Jansel Denız.
Esterińizge sala keteıik, Jambyl oblysynyń týmasy 20 jastaǵy Rýslan Japarov Olımpıadada Qazaqstan quramasynyń Baıraǵyn ustap shyǵady.
Qyzdar arasyndaǵy básekede synǵa túsetin qyzylordalyq 18 jastaǵy Aınur Esbergenova - jas ta bolsa biraz bıikterdi baǵyndyryp úlgergen talantty sportshylardyń biri. Aınur qaryndasymyzdyń sporttaǵy jetistikterin osyǵan deıin jazǵan bolatynbyz.
Endi úshinshi sportshymyz Jansel Denızge kelsek. Bul sportshynyń esimi buryn sport jankúıerlerine asa tanys emes. Sebebi, Jansel - Túrkııada dúnıege kelgen qazaq qyzy. Ol jat jerde týyp ósse de sportty jastaıynan janyna serik etken.
Jansel Denız 25 jasta (26/08/1991), Túrkııadaǵy qazaq otbasynda týǵan. Іri jeńisteri bolmasa da túrli halyqaralyq jarystardyń júldegeri. 2013 jyly Reseıdiń Chelıabınsk qalasynda ótken Ashyq týrnırdiń jeńimpazy, Eýropa chempıony. Túrkııanyń segiz dúrkin chempıony, Austrian Open týrnıriniń eki márte kúmis jáne qola júldesin enshilegen, Russian Open jeńimpazy, Dutch Open men Trelleborg Open jarystarynyń qola júlde ıesi, Ukraine Open jáne Moldova Open týrnırleriniń eki márte kúmis medalin oljalaǵan.
Ol Olımpıadaǵa deıin +67, +73 salmaqtarda synǵa túsip kelgen. Janseldi Túrkııa qazaqtary arasyndaǵy Mustafa Óztúrik bastaǵan taekvondo jolyn jalǵastyrýshylardyń biri deýge bolady. Jansel 2014 jyldyń sońynda Qazaqstan azamattyǵyn alǵan. Olımpıadada +67 keli salmaqta óner kórsetedi.
Ol Rıo olımpıadasyna joldamany Fılıppın eliniń Manıla qalasynda ótken Azııa qurlyǵy boıynsha irikteý týrnırinde jeńip alǵan bolatyn.
Janselmen jaqynda habarlasqanymyzda «Alǵashqy qatysqaly otyrǵan Olımpıadamda alǵash ret qazaq eliniń týyn jelbiretip shyqqaly otyrmyn. Ózge elde týsam da, óz elim atynan Olımpıadaǵa barý men úshin eń úlken qýanysh. Endigi maqsat - ult namysyn uıatqa qaldyrmaý. Qazir osy maqsatqa jetý úshin barynsha ter tógip jattyǵyp jatyrmyn. Armanym Rıoda jeńis tuǵyrynan kórinip, el úmitin aqtaý», - dep sózin qysqa qaıyrdy.
Bizde otanyna oralyp, úlken dodada baq synaıtyn qaryndasymyzǵa sáttilik tiledik...
