Jansaıa Ábdimálik jastar arasyndaǵy shahmat chempıonatynda «kúmis» jeńip aldy
ASTANA. 26 qyrkúıek. QazAqparat - On úsh jastaǵy qazaqstandyq shahmatshy Jansaıa Ábdimálik Túrkııanyń Kodjaelı qalasynda ótip jatqan jastar arasyndaǵy álemdik shahmat dodasynda ekinshi oryn aldy, dep habarlady vesti.kz.
Ábdimálik jarystyń sheshýshi 13-shi týrynyń aldynda reseılik Aleksandra Gorıachkınadan jarty upaı qalyp qoıǵan. Nátıjesinde, Gorıachkına óziniń sońǵy partııasyn jeńse, qazaqstandyq Indııanyń ókili Rýt Padmınımen teń oınaǵan.
Chempıon bolǵan reseılik barlyǵy 10 jarym upaı jınasa, Ábdimálik 9,5 upaımen toqtady. Sondaı-aq, úshinshi oryn úshin taǵy bir qazaqstandyq shahmatshy Dınara Sádýaqasova oınaǵan bolatyn, oǵan medal alýǵa 0,5 upaı jetpedi. Qosymsha kórsetkishterdi esepteý nátıjesinde Sádýaqasova 8,5 upaımen jetinshi orynǵa jaıǵasty.
Ábdimálik pen Sádýaqasovadan basqa týrnırde taǵy eki qazaqstandyq - Bıbisara Asaýbaeva jáne Janna Qarabaeva oınady.
Jansaıa Ábdimálik birneshe dúrkin álem chempıony ekendigin esterińizge salamyz. 17 jasar Dınara Sádýaqasova da óz qatarlastary ishinde eki dúrkin álem chempıony jáne Qazaqstan áıelderi arasyndaǵy eń jas halyqaralyq grossmeıster bolyp tabylady. Toǵyz jasar Bıbisara Asaýbaeva - qyzdar arasynda tórt dúrkin álem chempıony.
