Jansaıa Ábdimálik týrnırden ketýin túsindirdi, al FIDE basshysy shahmatshylardan keshirim surady
FIDE saıtyndaǵy málimetke qaraǵanda, Úndistanǵa kelgen shahmatshylar uıymdastyrýshylardyń óreskel qateliginen birqatar qolaısyzdyqqa tap bolǵan.
Sonyń saldarynan Qazaqstan ókili Jansaıa Ábdimálik jarysqa qatysýdan bas tartqan. 11 shahmatshy qalǵandyqtan, týrnır kestesin qaıta jasaýǵa týra keldi, degenmen Gran-prı kezeńi ótedi.
Dvorkovıch qalǵan 11 qatysýshydan keshirim surap, barlyǵyna hat joldaǵan.
«FIDE sondaı-aq qosymsha koordınator belgileıdi. Ol tolyǵymen qatysýshylardyń qaramaǵynda bolady jáne kez kelgen barlyq qosymsha shyǵynǵa ótemaqy usynady», - delingen FIDE saıtynda.
Budan bólek áıelder týrnırlerin uıymdastyrýdyń qaǵıdasy men standarty qaıta jiti qaralyp, aldaǵy is-sharalardy uıymdastyrýshylardyń biliktiligi arttyrylatyny jazylǵan.
Aıta keteıik, keshe shahmatshy Bıbisara Asaýbaeva áleýmettik jelide post jarııalap, onda Delıde bastalǵan mańyzdy Gran-prı týrnırinen Jansaıa Ábdimálik aıaqasty ketip qalǵanyn jazdy. Aıtýynsha, Jansaıaǵa uıymdastyrýshylardyń durys qarsy almaýy unamaǵan.
Óz kezeginde Jansaıa Ábdimálik bul qadamǵa barý sebebin túsindirdi.
Onyń sózine qaraǵanda, Úndistandaǵy týrnırde uıymdastyrýshylar jasaǵan jaǵdaıǵa ózi ǵana emes, Asaýbaevany qosa alǵanda, áriptesteri de rıza bolmaǵan. Olar aqyldasa kele, FIDE prezıdenti men apparat basshylyǵyna buǵan qanaǵattanbaıtynyn bildirip, ujymdyq hat jazǵan. Jarysty keıinge qaldyrý nemese ony ótkizbeý jóninde usynys jasaǵan. Aıtýynsha, hatqa Asaýbaevany qosa alǵanda, týrnırge qatysýshylardyń barlyǵy derlik qol qoıǵan.
«Mundaı jaǵdaıda oınaı almaıtynym jóninde FIDE prezıdenti Arkadıı Dvorkovıch pen atqarýshy dırektor Emıl Sýtovskııdi jeke ózim habardar ettim», - degen J.Ábdimálik uıym basshysynyń jaýap hatyn qosa usynyp, shahmatshylar qaýipsiz jáne durys jaǵdaıda oınaıǵa laıyqty ekenin jazdy.
«Men óz elim atynan qashan da maqtanyshpen jáne abyroımen oınaımyn. Úndistandaǵy Olımpıadany áli kúnge deıin jyly eske alamyn. Biraq Delıde jasalǵan jaǵdaı shynymen aqylǵa qonymsyz boldy», - deıdi ol.