Jansaıa Ábdimálik shahmattan basqa qandaı sportpen shuǵyldanatynyn aıtty
ALMATY. QazAqparat - Shahmattan Álem chempıony Jansaıa Ábdimálik saıystarda uzaq ýaqyt shydap otyrý úshin júzýmen aınalysatynyn aıtty, dep habarlaıdy QazAqparat tilshisi.
Búgin Almatyda baspasóz máslıhatyn ótkizgen Jansaıa Ábdimálik jaqynda Italııanyń Tarvızıo qalasynda 20 jasqa deıingi sportshylar arasynda ótken álem chempıonatynda qalaı jeńiske jetkenin baıandady.
Aıta keteıik, Jansaıa atalǵan álem birinshiliginde qajetti 11 upaıdyń 9,5-yn jınap, jeńis tuǵyrynan kórindi. Jansaıanyń aıtýynsha, bul jeńisi oǵan 2018 jyly áıelder arasynda ótetin álem chempıonatyna qatysýǵa jol ashqan.
«Tarvızıo qalasynda ótken saıys óte kúrdeli boldy. Sońǵy týrǵa deıin aıanbaı aıqasýǵa týra keldi. Týrnırge qatysýshylar arasynda men reıtıng boıynsha úzdikterdiń biri bolǵanyma baılanysty qarsylastarym maǵan bar kúshin jumsady. Biraq men bul saıysqa jarty jyl tyńǵylyqty daıyndaldym», - dedi Jansaıa Ábdimálik.
Jýrnalısterdiń suraǵyna jaýap bergen sportshy úlken saıystarda shahmat taqtasy aldynda uzaq ýaqyt tapjylmaı otyrýǵa ne kómekteskenin aıtyp berdi.
«Men júzýmen aınalysamyn. Onyń kómegi zor. Kúnde baramyn, jattyqtyrýshym bar, 1,5 saǵat júzemin. 2015 jyly álem chempıonaty aldynda men aýyryp qalyp, júzýge bara almadym. Sonyń kesirinen men saıystyń sońyna qaraı sharshap júrdim. Sońǵy týrda tipti qatty sharshadym. Eger meni tún ortasynda oıatyp myna oıyndy qalaı aıaqtar ediń dese, aıtyp berer edim, biraq álsizdikten men sońǵy oıynda qınaldym. Kofe de ishtim, shokolad ta jedim», - dedi sportshy.
Jansaıa sonymen qatar, úlken saıystan keıin qalaı demalatynyn aıtty.
«Men úlken saıystan keıin shahmat týraly oılamaýǵa tyrysamyn. Án tyńdap, taza aýada serýendeımin», - dedi ol.
Aıta keteıik, Jansaıa Ábdimáliktiń shahmat akademııasy Qazaqstan chempıonatyn ótkizý quqyǵyn jeńip alǵan. Atalǵan chempıonat 2018 jyldyń 4-16 qańtary aralyǵynda Almatyda Qazaq-brıtan ýnıversıtetinde ótedi. Oǵan barlyǵy 500 sportshy qatysady. Saıysqa Azııa jáne álem chempıonattarynyń júldegerleri Aısha Zakırova, Ámına Qaıyrbekova, Merýert Kamalıdınova, Ámel Serikbaı, Nazerke Nurǵalı syndy úzdikter qatysady.
