Jansaıa Ábdimálik «Miss Chess Eurasia» baıqaýynda jeńiske jetti
ASTANA. QazAqparat - Qazaqstandyq shahmatshy Jansaıa Ábdimálik Eýrazııanyń eń ádemi shahmatshysy atandy, dep habarlaıdy «QazAqparat» HAA.
Baıqaýdyń resmı saıtyndaǵy daýys berý búgin aıaqtaldy, nátıjesinde qazaqstandyq shahmatshy qyzǵa 9136 adam daýys bergen. Osylaısha, Jansaıa óziniń basty qarsylasy - ózbekstandyq shahmatshy Sarvınoz Kýrbonboevadan 1288 daýys artyq jınady.
Osylaısha, ekinshi oryn Ózbekstan shahmatshysy Sarvınoz Kýrbonboevaǵa (7848 daýys), úshinshi oryn tájikstandyq Mýtrıba Hotamıge (653 daýys) berildi.
17 jastaǵy qazaqstandyq Jansaıa Ábdimálik - áıelder arasynda halyqaralyq dárejedegi grossmeıster. Ol ázirge Top 100 Women January 2017 tiziminde 43 orynda tur. FIDE reıtınginde Jansaıa Ábdimálik - 2430-da tur.
Búginde Shymkent pen Almaty qalalarynda Jansaıanyń Shahmat akademııalary bar. Onda jas grossmeısterdiń ózi de, basqa ustazdar da balalarǵa shahmattyń qyr-syryn úıretýde. Bıyl osyndaı akademııalardy Mańǵystaý men Qaraǵandy oblystarynda ashý josparlanýda.
