Jansaıa Ábdimálik AQSh-taǵy bedeldi shahmat týrnırine shaqyrtý aldy
ALMATY. QazAqparat - «Saint Louis Chess Club» Jansaıa Ábdimálikti «Cairns Cup 2019» áıelder týrnırine qatysýǵa shaqyrdy.
Uıymdastyrýshylar jasynan tys álemdegi úzdik 10 shahmatshyny tańdap, AQSh-qa jeke shaqyryp otyr, dep habarlaıdy «QazAqparat» HAA tilshisi.
Jas shahmatshynyń aıtýynsha, bul kútpegen oqıǵa boldy.
«Shyny kerek, osy týrnırge shaqyrtý alamyn dep kútpep edim. «Saint Louis Chess Club» tujyrymy boıynsha álemniń úzdik on shahmatshysynyń qataryna kirip, onda Qazaqstannyń namysyn qorǵaý úlken jaýapkershilik», - deıdi Jansaıa.
«Cairns Cup 2019» týrnıri alǵash ret ótkizilgeli otyr, aldaǵy ýaqytta ol dástúrli týrnırler qataryna qosylady. Partııalar 2 aqpan kúni Mıssýrı shtatynyń Sent-Lýıs qalasyndaǵy áıgili Chess Club klýbynda bastalady. Sportshylar onda aınalym júıesi boıynsha upaı jınaıdy.
«Bul eń joǵary deńgeıdegi jarys bolmaq. Jansaıa oǵan Qazaqstan atynan qatysatyn birden-bir sportshy ári týrnırdiń eń jas qatysýshysy. Degenmen onyń álem chempıonattaryndaǵy oıyndary Jansaıanyń tájirıbeli qarsylastarynan qaımyqpaıtynyn talaı ret kórsetti», - deıdi Qazaqstannyń Shahmat federatsııasynyń atqarýshy dırektory Irına Grışenko.
Aıta keteıik, týrnırdiń júlde qory 150 myń dollar. Bul áıelder arasyndaǵy aınalym júıesinde ótetin jarystar tarıhynda buryn-sońdy bolyp kórmegen soma. Bir ereksheligi, oǵan qatysýshylardyń eshqaısysy da syıaqysyz qaıtpaıdy. Birinshi orynǵa 40 myń dollar, al onynshy orynǵa 5 myń dollar tigilgen.
Eske sala keteıik, Jansaıa Ábdimálik shahmattyń barlyq túrinen 20 jasqa deıingiler arasynda álem reıtınginde kósh bastap tur.
