Jansaıa Ábdimálik 20 jasqa deıingi shahmatshylardyń álemdik reıtınginde kósh bastady
ASTANA. QazAqparat - Jansaıa Ábdimálik shahmattyń barlyq túrinen 20 jasqa deıingiler arasynda álem reıtınginde kósh bastady. Buǵan deıin birde-bir qazaqstandyq shahmatshy bul bıikke kóterile almaǵan, dep habarlaıdy QazAqparat Qazaqstan Shahmat federatsııasyna silteme jasap.
«Qyzym - meniń maqtanyshym. Ol únemi eńbektenedi, sheberligin tynymsyz jetildirip otyrady. Osynaý tarıhı kórsetkish - onyń qyrýar eńbeginiń jemisi», - deıdi sportshynyń ákesi Danııar Áshirov.
Jansaıa kishkentaı kúninen shahmat oınaıdy, 14 jasynda Qazaqstannyń eń jas grossmeısteri atandy. Qazir on segizge tolǵan boıjetkenniń qorjyny respýblıkalyq jáne halyqaralyq týrnırlerdiń júldelerimen tolǵan.
«Men únemi oıynǵa barymdy salýǵa tyrysamyn. Osy kúnge jetkizgen ata-anamnyń, bapkerlerimniń aldynda boryshtymyn. Iá, bul - jaqsy nátıje, biraq toqmeıilsýge bolmaıdy. Men úshin eń bastysy - kún saıyn keshegige qaraǵanda jaqsyraq oınaý», - deıdi jas sportshy.
2018 jyldyń qarashasynda eresekter arasyndaǵy álem chempıonatynda debıýtin toılaǵan Jansaıa Qazaqstan shahmaty tarıhynda shırek fınalǵa shyqqan alǵashqy sportshy boldy. Al jeltoqsan aıynda rapıd jáne blıts boıynsha ótken álem chempıonatynda áıelder arasynda jyldam shahmattan 6-oryndy ıelendi.
