Janna Áýbákirova Delı jurtshylyǵyn ónerine tánti etti
BEIJІŃ - DELI. QazAqparat - 2 jeltoqsan kúni QR Tuńǵysh Prezıdentiniń kúnine oraı Qurmanǵazy atyndaǵy qazaq ulttyq konservatorııasynyń rektory, tanymal pıanınoshy Janna Áýbákirova Indııa astanasynda fortepıano mýzykasynan jeke kontsert berdi, dep habarlaıdy QazAqparat tilshisi.
Kesh qonaqtary Indııa Syrtqy ister mınıstriniń orynbasary Godavarthı Venkata Srınıvas, saıasat jáne qoǵam qaıratkerleri, Dıplomatııalyq ókildikter basshylary, bıznes elıta ókilderi, BAQ jáne basqa da klassıkalyq mýzykany baǵalaýshylar boldy.
Kontsert kópshiliktiń kóńilinen shyqty. Tyńdarmandardy qazaqstandyq oryndaýshynyń Frederık Shopen jáne Antonın Dvorjak syndy uly kompozıtorlardyń týyndylaryn asqan sheberlikpen jetkizgeni tańǵaldyrdy.
Kópshilik bul kontsert Qazaqstannyń mádenı damýynyń qandaı deńgeıde ekendigin kórsetti dep baǵa berdi.
Óz sózinde Qazaqstan elshisi Bolat Sársenbaev bıyl Qazaqstan men Indııa arasynda dıplomatııalyq qarym-qatynastyń ornaǵanyna 25 jyl tolyp otyrǵanyn atap ótti.
«Osy az ǵana ýaqyttyń ishinde Qazaqstan men Indııa halyqtar dostyǵyna jáne eki el úkimetteriniń ózara tıimdi yqpaldastyqty arttyrýǵa negizdelgen erik-jigerimen strategııalyq qarym-qatynas quryp úlgeredi», - dedi ol.
