Janna Asanova turǵyn úı men kommertsııalyq úı-jaılardy retsiz qaıta jobalaýǵa alańdaýshylyq bildirdi
ASTANA. KAZINFORM — Almaty aýmaǵyndaǵy taıaýda bolǵan jer silkinisi elimizdegi turǵyn úı qurylysynyń sapasy týraly jurtshylyqty oılandyryp tastady. Senator Janna Asanova óziniń depýtattyq saýalynda turǵyn úı men kommertsııalyq úı-jaılardy baqylaýsyz qaıta jobalaýdyń qaýpi týraly aıtyp berdi.
Depýtat menshik ıesi óz mekenin qolaıly etý úshin úı-jaıdy qaıta jobalaýǵa jıi baratynyn atap ótti. Alaıda ol jumys arhıtektýralyq normalardy muqııat saqtaýdy talap etedi. Ásirese, ǵımarattyń negizgi tiregi bolatyn qabyrǵasy nemese qasbetiniń ózgerýine qatysty erejeler qatań saqtalýy tıis. Qurylystyń tutastyǵy men turaqtylyǵyna nuqsan kelse, ǵımarat qulap qalýy yqtımal. Sonymen qatar keıbir qaıta jobalaý kezinde órt qaýipsizdigi erejeleri buzylady jáne kommýnaldyq júıelerdi paıdalaný múmkindigi nasharlaıtyn bolady.
«Qoldanystaǵy zańnama kóp qabatty úılerdegi páterler men úı-jaılardyń ıelerine esik aýystyrý nemese bólmelerdi biriktirý barysynda negizgi qabyrǵalardyń tutastyǵyn buzýǵa tyıym salady. Biraq kóptegen jyldar boıy kommertsııalyq qurylys salasynda memlekettik baqylaý azaıǵany jáne josparly tekserýge áli de tyıym salynǵany barshaǵa belgili. Sonymen qatar kóptegen ǵımarattar men turǵyn úılerdiń ıeleri salynǵan sátten bastap úıdi qaıta jobalaýdy bastaıdy jáne zańdastyrady. Tıisinshe qujattar rásimdeledi. Al bastapqy normatıvtik qujattar keıbir zańnyń muraǵatynda jatqany belgili. Úıdiń negizgi qabyrǵasynyń tutastyǵy buzylǵan jaǵdaıda turǵyndardyń ózderi saraptama júrgizýi kerek. Biraq eger ol úı birneshe ret qaıta satylǵan bolsa, onda qaıta jobalanǵanynyń zańsyzdyǵyn dáleldeý múmkin emes», - dedi Janna Asanova.
Depýtat qazirdiń ózinde salynǵan ǵımarattar men turǵyn úılerdiń zańsyz qaıta jobalanǵanyn anyqtaý, sondaı-aq álsiz qurylystardy baǵalaý úshin tıisti mınıstrlikter men mekemelerdiń keshendi taldaý júrgizýi kerektigin aıtty. Zańsyz qaıta jobalaýdy anyqtaý jáne jolyn kesý úshin seısmıkalyq qaýipti aımaqtarda jumys toptaryn qurý kerek. Qujattardyń normalarǵa sáıkestigi men qaıta josparlaýǵa ruqsattyń negizdemesi tekserilý kerek. Sondaı-aq zańsyz qaıta josparlaǵany úshin jazany qylmystyq jaýapkershilikke deıin qatańdatý jáne qurylys normalary men erejelerin saqtaý máselesinde, onyń ishinde turaqty tekserý júrgizýde baqylaýshy organdardyń rólin kúsheıtý kerek.
