Jankúıerlerdi qýantý úshin altyn alýǵa bar kúsh-jigerimdi jumsadym-Azıada chempıony E. Hrýstaleva
ALMATY. 4 aqpan. QazAqparat - Bıatlonnan qyzdar arasyndaǵy 15 shaqyrymdyq jekeleı synda 7-Qysqy Azııa oıyndarynyń chempıony atanǵan qazaqstandyq sportshy Elena Hrýstaleva jarystan keıin jankúıerlerdi qýantý úshin altyn medal alýǵa bar kúsh-jigerin jumsaǵanyn aıtty.
Aıta keteıik, bıatlonnan 31 qańtar kúni ótken 7,5 shaqyrymdyqtyq jarysta eshkimge des bermeıdi dep boljaǵan Elena Hrýstaleva kúmis júldeni qanaǵat tutqan bolatyn.
"7,5 shaqyrymdyqtyq sprınttik jarysta alǵan kúmis júldem, búgin meni altyn alýǵa qamshylady. Bir qýanatynym, birinshi jarysqa qaraǵanda men ózimdi jaqsy sezindim. Stadıonda ǵana emes, odan da tysqary jerlerde meniń tileýimdi tilegen jankúıerlerimdi qýantqym keldi. Shynymdy aıtsam, búgin búkil eldi qýanyshqa bólegim keldi. Eki atys alańynda nysanany dál kózdeı almaǵan kezimde, ózime-ózim qamshy basýǵa tyrystym. Nysanany túregep turyp kózdegennen, shyntaqtap jatyp kózdegen áldeqaıda jeńilirek. Sondyqtan da úshinshi atys alańynda bári oıdaǵydaı boldy. Al sońǵy atys alańyna kelgen kezimde múlt ketpeý úshin barymdy saldym. Tuman qoıýlanǵandyqtan, nysanany ádettegiden uzaǵyraq kózdeýge týra keldi. Sol sátte men óz elim jaıly, jankúıerlerim jaıly, olardyń maǵan artqan senimi men qoldaýlary jaıly oıladym. Sátin salyp, barlyq nysanaǵa dóp tıgizdim. Sosyn márege qaraı qustaı ushtym", - deıdi E. Hrýstaleva.
Budan buryn habarlaǵanymyzdaı, búgin Almaty oblysyndaǵy Soldat shatqalyndaǵy Shańǵy-bıatlon stadıonynda ótken bıatlonan qyzdar arasyndaǵy 15 shaqyrymdyq jekeleı syn jarysynda Elena Hrýstaleva Qazaqstan qorjynyna 20-altyn júldeni salǵan bolatyn. Bul jarysta kúmis medaldi japonııalyq Sýdzýkı Fýıýko, qola júldeni qazaqstandyq Marına Lebedeva jeńip aldy.
