Jankúıerler Belgııa men Qazaqstan kezdesýine jınalyp jatyr
ASTANA. KAZINFORM - Búgin Brıýssel qalasynda 2026 jylǵy álem chempıonaty irikteý kezeńinde Belgııa jáne Qazaqstan quramalary sheberlik baıqasady.
Dál qazir stadıon aýmaǵyna belgııalyq jankúıerler jınalyp jatyr. Oǵan qosa el quramasyn qoldaýǵa kelgen otandastarymyz da bar.
Eki qurama arasyndaǵy oıyn «Konstant Vanden Stok» (frantsýzsha Stade Constant Vanden Stock; gollandsha Constant Vanden Stockstadion), oǵan qosa «Lotto Park» ataýymen kópshilikke belgili stadıonda ótedi. Ǵımarat Brıýssel qalasy aýmaǵyndaǵy Anderleht mýnıtsıpalıtetinde ornalasqan.
Stadıon «Anderleht» fýtbol klýbynyń óz alańyndaǵy oıyndaryn qabyldaıdy. Onda 1972 jyly Eýropa chempıonatynyń jartylaı fınalyndaǵy Vengrııa Jáne Keńes Odaǵy quramalary sheberlik baıqasty. Sondaı-aq atalǵan stadıonda Belgııa ulttyq quramasynyń birneshe oıyndary ótkizildi.
Qazirgi ýaqytta stadıonnyń syıymdylyǵy 21 500 adamǵa arnalǵan. Buryn ol 40 000 adamdy qabyldaıtyn alatyn. Qaýipsizdik sharalaryna baılanysty jankúıerlerge arnalǵan oryndyqtar sany qysqartyldy.
Kezdesý Qazaqstan ýaqytymen 23:35-te bastalyp, «Qazsport» telearnasynan tikeleı efırde kórsetiledi.
Bas tóreshi mindeti rýmynııalyq Radý Petreskýge júktelgen. Oǵan otandastary Radý Gıngýlıak pen Mırcha Grıgorıý kómektesedi. Qosalqy tóreshi de sol eldiń ókili Andreı Kıvýlete.
Eki qurama qazirge deıin alty márte kezdesti. Onyń ekeýinde teń nátıje tirkelse, qalǵanynda qazaqstandyq fýtbolshylar qarsylasyna ese jiberdi.
Quramalar J tobynda synǵa túsip jatyr. Qazirge deıin 4 oıynnan keıin Ýels quramasy 10 upaımen birinshi orynda tursa, odan keıingi oryndardaǵy Soltústik Makedonııanyń 8, Belgııanyń 7, Qazaqstannyń 3 upaıy bar. Ázirge Lıhtenshteınniń qorjyny bos.
Qazirge deıin otandastarymyz irikteý kezeńinde Lıhtenshteındi (2:0) jeńse, odan keıin eki márte Ýelske (1:3, 0:1) jáne Soltústik Makedonııaǵa (0:1) ese jiberdi.
Al Belgııa quramasy Soltústik Makedonııamen (1:1) teń túsip, odan keıin Ýels (4:3) jáne Lıhtenshteındi (6:0) jeńdi.