Jankúıerler asa aýyr salmaqtaǵy qazaqstandyq atletshilerden de júlde kútedi
ASTANA. QazAqparat - Búgin Groznyı qalasynda ótip jatqan Aýyr atletıka boıynsha Reseı Federatsııasy Prezıdentiniń Kýbogy úshin besinshi halyqaralyq týrnırdiń sońǵy kúni de tartysty ári úlken qyzyǵýshylyqpen ótedi dep kútilýde.
Óıtkeni asa aýyr salmaqtaǵy sportshylar óner kórsetpek.
Atap aıtqanda, Astana ýaqyty boıynsha saǵat 18-00-de áıelder 75 keliden joǵary salmaq boıynsha kúsh synasady. Bul salmaqta qazaqstandyq Aleksandra Aborneva el namysyn qorǵaıtyn bolady.
Al Astana ýaqyty boıynsha saǵat 20-00-de erler arasyndaǵy 105 keliden joǵary salmaqtaǵy ziltemirshiler óz kúshterin pash etedi. Elimizdiń aýyr atletıka federatsııasynyń málimdeýinshe, osy salmaqta Qazaqstannyń úsh sportshysy baq synaıdy, olar - Dmıtrıı Kaplın, Ibragım Bersanov jáne Selımhan Abýbakarov.
Álemniń teńdessiz atleti Ilıa Ilınniń jeńisinen qýat alǵan qazaqstandyqtar búgin kúshin synǵa salatyn sportshylarymyzdan da júlde kútedi jáne olarǵa sáttilik tileıdi.
Reseı Federatsııasy Prezıdentiniń Kýbogy úshin besinshi halyqaralyq týrnırdiń jabylý rásimi búgin Astana ýaqytymen saǵat 22-00-de ótedi dep josparlanǵan.
