«Jankúıer maqtanatyndaı jekpe-jek kórsettiń»: Gennadıı Golovkın Nurbek Oralbaıdy quttyqtady
PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndarynda QR Ulttyq olımpıadalyq komıtetiniń prezıdeni Gennadıı Golovkın Nurbek Oralbaıdy kúmis júldeger atanýymen quttyqtady.
«Ulttyq Olımpıada komıteti men jeke óz atymnan Olımpıada oıyndarynyń kúmis júldegeri Nurbek Oralbaıdy shyn júrekten quttyqtaımyn. Búgin barsha qazaqstandyq Sizben birge sharshy alańda boldy desek, artyq emes. Olımpıadanyń kúmis júldesi – úlken marapat. Siz jankúıer maqtanatyndaı jekpe-jek kórsettińiz. Sonymen qatar, Nurbektiń jeke bapkeri Asqar Erkebaevty da quttyqtaımyn! Ol shákirtin Olımpıada tuǵyryna alyp kelgen myqty maman ekeni anyq. Sizderdiń alǵashqy Olımpıadalaryńyz sporttyq mansabyńyzdyń tek bastamasy bolsyn. Jeńisimiz arta bersin, elimizdiń kók baıraǵy bıikte jelbireı bersin», - Gennadıı Golovkın.
Esterińizge sala keteıik, búgin bokstan erler arasynda 80 keli salmaqta Nurbek Oralbaı Parıj Olımpıadasynyń kúmis júldegeri atandy.
Ol fınalda ýkraınalyq Aleksandr Hıjnıakpen judyryqtasyp, jeńilip qaldy.
Aıta ketsek, Parıj Olımpıadasyna bas bapker Myrzaǵalı Aıtjanov jeti boksshy alyp kelgen bolatyn. Ókinishke qaraı, onyń altaýy jarysty erte aıaqtady.
Al áıelder boksynan lıtsenzııa jeńip alǵan úsh boksshynyń ekeýi alǵashqy jekpe-jeginde jarys jolyn aıaqtasa, tek olardyń arasynan 50 keli salmaqta Nazym Qyzaıbaı ǵana el úmitin aqtady. Ol el qorjynyna Olımpıada oıyndarynyń úshinshi qola júldesin syılaǵan edi.
