Janqoja batyrǵa tıesili qylyshtyń kóshirmesi týǵan jerindegi mýzeıge qoıyldy
QYZYLORDA. KAZINFORM — Qazaqtyń dańqty batyry, qolbasshy Janqoja Nurmuhamedulynyń kózi tirisinde qoldanǵan qylyshy týǵan óńiri Qyzylorda oblysynyń Qazaly aýdanyna ákelindi. Bul týraly aýdan ákiminiń baspasóz qyzmeti habarlady.
Qylyshtyń túpnusqasy Ulttyq mýzeı qorynda saqtaýly tur. Tarıhı qundy jádigerdiń kóshirmesin baba urpaqtary arnaıy jasatqan. Aýdandyq Rýhanııat ortalyǵyndaǵy mýzeıge ony batyr babanyń urpaǵy Alǵashbaı Baıkóbekov tabys etti.
Batyrdyń qylyshy aldymen ýkraınalyq izdeýshi mamandardyń qolyna túsken. Keıin Reseıde arnaıy saraptamadan ótkizilip, ony Qazaqstan azamattary satyp alyp, Ulttyq mýzeıge tabystaǵan. Qylyshty Janqoja Nurmuhamedulyna Kenesary han syıǵa tartqan degen derek bar. Batyr ony jaýǵa qarsy shaıqasta qoldanǵan.
Jádigerdiń eki jaǵynda arabsha jazý bar. Birinde «Janqoja Nurmuhameduly bahadúrge saýrat (syılyq)», ekinshisinde «Sozaq, 1845 jyl» dep jazylǵan.
Buǵan deıin biz eki márte Sotsıalıstik Eńbek Eri Ybyraı Jaqaev tutynǵan zattar Qyzylorda oblysynyń Shıeli aýdanyndaǵy ózimen attas aýyldaǵy mýzeıde saqtaýly turǵanyn jazǵanbyz.