Janqosh Turarov jekpe-jegi jaıynda pikir bildirdi

ALMATY. QazAqparat - Almatyda ótken boks keshindegi tıtýldyq jekpe-jekte jeńiske jetken qazaqstandyq sportshy Janqosh Turarov kezdesýi jaıynda pikirin bildirdi, dep habarlaıdy QazAqparat tilshisi.

Qazaqstandyq Janqosh Turarov (26-0, 19 KO) tıtýldyq jekpe-jekte meksıkalyq Alehandro Menesesti tize búktirdi.

«Maǵan qoldaý bildirgen barlyǵyńyzǵa alǵys aıtamyn. Sizderdiń qoldaýlaryńyz meni jeńiske jeteledi. Sonyń arqasynda chempıondyq ataqqa qol jetkizdim. Barlyǵyǵyzǵa úlken alǵys. Chempıon ataný - árbir sportshynyń armany. Eki jyl buryn jekpe jekte qolymnan jaraqat aldym. Úshinshi raýndta taǵy bir jaraqat boldy. Bolashaqta budan da jaqsy oıyn kórsetetinime senemin. Sizderdiń senimderińizdi aqtaımyn», - dedi ol jekpe-jekten keıin.

Aıta ketsek, qazaqstandyq boksshynyń qarsylasy toǵyzynshy raýndtan keıin jarysty jalǵastyrýdan bas tartty.