16:21, 20 Qyrkúıek 2019 | GMT +5
Jańqosh Turarov sharshy alańǵa qarasha aıynda oralady
NUR-SULTAN. QazAqparat – 2019 jyldyń 22 qarashasynda Londondaǵy «York Hall» sport ortalyǵynda «MTK Global» kompanııasy ótkizetin «Golden Contract» boks týrnıriniń birinshi orta salmaqtaǵy jekpe-jekteri uıymdastyrylady, dep habarlaıdy QazAqparat tilshisi.

«Qazaqstan kásipqoı boksy» VKontakte paraqshasy habarlaǵandaı, boks keshine jeti boksshy qatysatynyn rastaǵan. Olardyń ishinde qazaqstandyq Jańqosh Turarov ta bar. Odan bólek, týrnırde Ohara Devıs, Taıron MakKenn, Akım Ennıs Braýn, Mohamed Mımoýna, Entonı Iıgıt pen Darren Sýrtıs óner kórsetedi.
Eń qyzyǵy, atalmysh týrnırde boksshylar óz qarsylasynyń esimin aıqasqa bir apta ǵana qalǵanda biledi.
Týrnırdi amerıkalyq ESPN men brıtandyq Sky Sports telearnasy kórsetedi.
Eske sala ketsek, sońǵy jekpe-jegin Jańqosh Turarov Maksımılıano Godoıǵa (31-4-1, 16 KO) qarsy ótkizgen edi. Turarov jartylaı orta salmaqtaǵy WBO Inter-Continental ekinshi deńgeıli tıtýly úshin aıqasta argentınalyqty nokaýtpen jeńdi.