Janqosh Turarov koronavırýs juqtyrýyna baılanysty jekpe-jekke shyqpaıtyn boldy

NUR-SULTAN. QazAqparat - Erteń Dýbaıda ótetin boks keshinde jekpe-jekke shyǵýǵa tıis qazaqstandyq kásipqoı boksshy Janqosh Turarov koronavırýs juqtyrýyna baılanysty judyryqtaspaıtyn boldy, dep habarlaıdy QazAqparat.

Bul jaıynda sportshy óziniń Instagram paraqshasynda jazdy.

«Ókinishke qaraı, búgingi týrnırde óner kórsete almaıtyn boldym. Bári dúnıe júzin jaýlap turǵan koronovırýsqa baılanysty. Dýbaıǵa kelgen kúnnen bastap entigý, temperatýra, murynnyń bitýi, dám sezbeý sımptomdary paıda boldy. Týrnırge shyǵar aldynda mindettelgen PTR test oń nátıje kórsetip, meni qonaq úı nomerinde oqshaýlady. Salmaq ólsheý rásimine shyǵa almaýymnyń sebebi osy boldy» dep jazdy Janqosh Turarov.

Óziniń aıtýynsha, ol eshteńege qaramastan nomer ishinde de skakalka sekirip, júgirý arqyly jattyǵýdy toqtatpaı, óz formasyn ustap, bekitilgen salmaqqa jetken.

Sóıtip oqshaýlanǵan kúıde nomer ishinde salmaq ólsheý rásimi ótkizilgen.

«COVID-19 qaıtadan PTR ótkizýdi ótindik, ókinishke qaraı búgingi nátıje taǵy da «oń» kórsetti. Aınalama, qorshaǵan ortama degen jaýapkershilikti sezine otyryp, koronavırýstyń tez juqpaly ekenin eskere otyryp týrnırden shettetildim. Eger dál osy dıagnoz bolmaǵanda qazirgi jaǵdaıymmen-aq maǵan 3 raýnd jetkilikti edi. Biraq, amal qansha, barlyǵy bir Allanyń qalaýy. Búkil álemdi dúrliktirip turǵan myna dertten aman bolyńyzdar, aýyrmańyzdar» deıdi boksshy.

Eske sala keteıik, biz osynyń aldynda Janqosh Turarovtyń brıtandyq Taıron Makkenamen bolatyn aıqas aldynda salmaq ólsheý rásimine kelmegenin jazǵan edik.