Jańqosh Turarov Eleýsinovtiń «GGG-Rolls» anderkartynda shyqpaýyna qatysty pikir bildirdi

NUR-SULTAN. QazAqparat - Qazaqstandyq kásipqoı boksshy Jańqosh Turarov GGG-Rols jekpe-jeginiń anderkartynda Danııar Eleýsinovtiń shyqpaı qalýyna baılanysty pikirin bildirdi, dep habarlaıdy QazAqparat tilshisi.

«Qazirgi ýaqytta ózimniń eń alǵashqy bapkerim - Saǵatbek Musahanov degen kisimen jattyǵyp jatyrmyn. Qudaı qalasa, sol kisimen daıyndalamyz. Shetelderde sparrıngter ótkizemiz. Ol jaǵynan másele joq. Nur-Sultanda ótetin aıqasqa júz paıyz daıyn bolamyn», - dedi Jańqosh Turarov OKQ-da ótken baspasóz máslıhatynda.

Sonymen birge, boksshyǵa Gennadıı Golovkın óziniń jekpe-jeginiń anderkartynda Danııar Eleýsinovtyń shyǵýyna qarsylyq bildirgenine qatysty suraqqa jaýap berdi.

«Gennadıı Golovkınniń aǵamyzdyń óziniń jarysy. Kimdi qoısa nemese qoımasa - ózi biledi. Ol jaǵyn ózi sheshedi», - deıdi Jańqosh Turarov.

Eske sala ketsek, budan buryn habarlanǵanymen, Danııar Eleýsinovtiń Golovkınniń jekpe-jeginde óner kórsetpeıtini belgili bolǵan edi. Boksshynyń menedjeri Zııa Alıev Sports.kz-ke bergen suhbatynda, Eleýsinovtyń 8 maýsymdaǵy Golovkın-Rolls anderkardyndaǵy jekpe-jegi belgisiz sebepterge baılanysty bolmaıtynyn jetkizgen.

Keıin tipti bul máselege qatysty QR Kásipqoı boks federatsııasynyń vıtse-prezıdenti Vıktor Demıanenko pikir bildirip, Golovkın men Eleýsinov arasynda qandaı da bir túsinbeýshilik bar degenge senbeıtinin aıtqan bolatyn.

Al Jańqosh Turarov bolsa, elordada 6 shildede ótetin boks keshinde óner kórsetedi.