Jańqosh Turarov: Álem chempıony bolýǵa taǵy bir qadam jaqyndadym

NUR-SULTAN. QazAqparat - Bir jarym jyl boıy sharshy alańǵa shyqpaǵan qazaqstandyq kásipqoı boksshy Jańqosh Turarov aldaǵy eki aıdyń ishinde Anglııa men Qazaqstanda ótetin jekpe-jekterine qalaı daıyndalyp jatqanyn aıtyp berdi, dep habarlaıdy QazAqparat tilshisi.

«Bir jarym jyl ýaqyt boksqa shyqpadym. Dese de, jattyǵýdy úzgen joqpyn. Óz babymdamyn. Boks maǵan jat emes. Ómirimdi osy sportqa arnadym desem de bolady. 13 jastan sportty bastaǵanmyn. Bir jarym jyl degen maǵan eshteńe emes. Alla qalasa, álemdik beldikterdi alamyz degen oıymyz bar. 6 shildedegi elordadaǵy jekpe-jekke deıin Anglııada reıtıngtik kezdesý ótkizemin. Daıyndyq óte tamasha. Bárine daıynbyz», - dedi Jańqosh Turarov OKQ-da ótken baspasóz máslıhatynda.

Boksshy óz sózinde boksqa kelgennen bastap álem chempıony bolý maqsatynan qaıtpaǵanyn atap ótti.

«Sátin salsa, MTK Qazaqstan menedjerlik kompanııasymen jaqyn ýaqytta kelisimge keldik. Men úshin óte úlken qýanyshty jańalyq. Álem chempıony bolýǵa taǵy bir qadam jaqyndadym», - dedi Jańqosh Turarov.

Eske sala ketsek, elordada 6 shildede kásipqoı boks keshi ótedi. Ol kúni Sultan Zaýyrbek, Vıktor Kotochıgov, Alı Baloev, Ábilqaıyr Shegalıev, Nurtas Ájbenov jáne Abaı Tólesh sekildi boksshylar óner kórsetpek.

Jańqosh Turarov (22-0, 15KO) 6 shilde kúni elordada ótetin kásipqoı boks keshinde óner kórsetetinin buǵan deıin habarlaǵan bolatynbyz.

MTK Global promoýterlik kompanııasymen kelisimge kelýi Jańqosh Turarovqa jańa múmkindikterdi ashyp otyr.