Jańqosh Turarov 2 jyldyq úzilisten keıingi jekpe-jegin Ýelste ótkizedi

NUR-SULTAN. QazAqparat - Qazaqstandyq kásipqoı boksshy Jańqosh Turarov (22-0, 15KO) birshama úzilisten keıin sharshy alańǵa qaıtadan oralyp, jaqyn arada jekpe-jek ótkizetin boldy, dep habarlaıdy QazAqparat tilshisi.

«Qazaqstan kásipqoı boksy» VKontakte paraqshasynda jarııalanǵandaı, boksshynyń kelesi aıqasyna qatysty menedjeri Asqar Salyqbaev naqty datany ataǵan. Onyń aıtýynsha, Jańqosh 1 maýsym kúni Ýels astanasy Kardıffede kelesi aıqasyn ótkizedi. Jańqoshtyń qarsylasy aldaǵy ýaqytta belgili bolmaq.

Qazaq boksshysy osyǵan deıin 2 jyl boıy eshkimmen kezdespegen edi. Al sońǵy aıqasyn 2017 jyldyń 9 qyrkúıeginde ótkizip, tóreshilerdiń biraýyzdan qabyldaǵan sheshimimen argentınalyq Brýno Leonardo Romaıany (21-7, 8KO) jeńgen bolatyn.

Eske sala ketsek, MTK Global menedjerlik kompanııasy qazaqstandyq kásipqoı boksshy Jańqosh Turarovpen (22-0,15KO) kelisimshartqa otyrǵanyn buǵan deıin habarlaǵan bolatynbyz.

«Bul men úshin keremet jańalyq! MTK Global - álem boksyndaǵy úzdik menedjerlik komanda ekenine senemin. Olarmen birge jumys isteýge asyqpyn. Kóptegen qazaqstandyq boksshylar men nusqaýshylardan MTK Kazakhstan-nyń bolashaǵy jarqyn ekenin estigenmin. Túbi álem chempıony atanatynyma senimdimi», - dedi Jańqosh Turarov.