Jankeshti Ystambuldyń ortalyǵynda ózin jaryp jiberdi
ASTANA. QazAqparat - Ystambuldyń qaq ortasyndaǵy polıtsııa bólimshesinde jankeshti ózin-ózi jaryp jiberdi. Bul týraly qala gýbernatoryna siltememen 24.kz habarlady.
Oqıǵa bolǵan jer shahardyń tarıhı ortalyǵy sanalatyn - Sultanahmet alańy. Bul lańkestik áreketti jasaǵan áıel adam bolyp shyqty.
Jankeshti beline orap alǵan jarylǵyshty ǵımarattyń ishine kirip jaryp jibergen. Jarylystan eki polıtsııa qyzmetkeri jaralandy. Onyń biri keıin jan tapsyrǵan. Quqyq qorǵaýshylardyń málimdeýinshe, polıtsııa bólimshesine áıel «ámııanymdy joǵaltyp aldym» dep aryzdanyp kelgenge uqsaıdy. Ári aǵylshyn tilinde sóılegen.
Qazir jarylys jasap, o dúnıelik bolǵan jankeshtiniń jeke tulǵasy men ulty anyqtalyp jatyr.
