Jankent qalashyǵyn qaıta jańǵyrtý jumystary júrip jatyr
Bul shara QR Tuńǵysh Prezıdenti - Elbasy Nursultan Nazarbaevtyń «Bolashaqqa baǵdar: Rýhanı jańǵyrý» baǵdarlamasy aıasynda qolǵa alynyp otyr.
Atalǵan qalashyq VІІ-HІV ǵasyrlarda Jankent, ıAngıkent dep atalǵan. Túrikmen tarıhshysy Ábilǵazy Bahadúrdiń aıtýynsha, oǵyz eline júzdegen jyldar boıy astana bolyp kelgen. Jankent shahary Syr ózeniniń sol jaq betinde oryn tepken. Aýdan ortalyǵy - Áıteke bı kentine 15-20 shaqyrym qashyqtyqta jatyr. Qazaly aýdany aýmaǵyndaǵy Órkendeý aýylyna óte jaqyn ornalasqan.
Búgingi tańda Jankent qalashyǵynda qazba jumystary júrgizilip jatyr. Ol Qyzylorda oblysynyń tarıhı-mádenı muralaryn qorǵaý jáne paıdalaný jónindegi ǵylymı-ádistemelik keńestiń sheshimimen júzege asyrylýda. Dalalyq ekspedıtsııa jumystaryn Qorqyt ata atyndaǵy Qyzylorda memlekettik ýnıversıtetiniń ǵalymdary qolǵa alyp otyr. Oǵan ýnıversıtettiń arheologııa jáne etnografııa ǵylymı-zertteý ortalyǵynyń jetekshisi, PhD doktor Ázilhan Tájekeev jetekshilik jasap keledi.
«Bıylǵy qazba jumysynda qalashyqtyń shahrıstan bóliginde ornalasqan turǵyn úı keshenine zertteý júrgizildi. Eskertkish tsıtadeliniń soltústik qabyrǵasynan arshylǵan munaralar men oǵan jalǵasyp jatqan qabyrǵalarǵa nazar aýdaryldy. Sondaı-aq, qalashyqtyń shyǵys qabyrǵasynyń ortańǵy bóligine qazba salynyp, tolyq arshyldy», - dedi Ázilhan Tájekeev.
Qazirgi tańda turǵyn úı keshenine konservatsııa júrgizilip, ústi metall jabyndymen shatyrlandy. Respýblıkalyq bıýdjet esebinen qalashyqty qaıta jańǵyrtý jumystary da qatar júrgizilýde.
Budan buryn Qyzylordada stýdentter kóne Jankent qalashyǵyn zertteıtinin habarlaǵan edik.
