Jánııa jańa baǵdarlama usynady
16 qazanda «Astana Opera» teatrynda Qazaqstannyń halyq artısi, dúnıe júzine aty máshhúr pıanınoshy Jánııa Áýbákirovanyń kontserti ótedi, dep jazdy «Aıqyn» respýblıkalyq gazeti búgingi sanynda.
«Jibek Joly» II halyqaralyq festıvaliniń aıasynda qolǵa alynǵan kesh «Astana Opera» sımfonııalyq orkestriniń qatysýymen júzege asady. Dırıjerlik tizginde álemdegi eń joǵary suranystaǵy maestrolardyń biri, AQSh-tan arnaıy keletin qonaq - Dorıan Ýılson.
Baǵdarlama Tiles Qajyǵalıevtiń «Qyz qýý» sımfonııalyq kúıimen ashylady. Odan keıin A.Dvorjaktyń sońǵy sımfonııasy oryndalady. Sondaı-aq Sergeı Rahmanınovtyń fortepıano men orkestrge arnalǵan № 3 re mınor, op. 30 kontserti tyńdarman nazaryna usynylady. Mýzykalyq týyndy 106 jyl buryn dúnıege kelgen, alaıda kúni búginge deıin avtordyń eń tanymal jáne jıi oryndalatyn shyǵarmalarynyń biri bolyp tabylady. Fortepıanolyq repertýarda eń kúrdeli ári maǵynasy keń kontsertterdiń biri retinde joǵary bedelge ıe. - Pıanınoshylar úshin bul - alpınıster baǵyndyrýǵa umtylatyn shyrqaý shyń tárizdi shyǵarma. Bul týyndyny has talanttar ǵana repertýaryna qosa alady. Qudaıǵa shúkir, bizdiń qorjynymyzda barlyq zamannyń asqaq mýzykalary bar. Men úshin S.Rahmanınovtyń № 3 kontsertin oryndaý erekshe baqyt. Shynymdy aıtsam, mundaı mýzykalyq týyndyny tyńdaý men túsiný de ońaı emes, ol úshin tyńdarman da mádenı-saýatty, parasatty bolýy kerek. Astananyń, jalpy Qazaqstannyń turǵyndary mýzykaǵa degen qushtarlyǵymen qýantady. Ózge elderge qaraǵanda úlken yntamen qabyldap, sińire alady. Meniń sheteldik seriktesterim de elimizge kelgende, bizdiń halyqtyń qabileti tamasha ekenin únemi aıtyp otyrady. Sol sebepti, maǵan artylatyn jaýapkershilik óte úlken. Árıne, kontsert saıyn tolqısyń, sahnada ne bolatynyn aldyn ala boljaýǵa bolmaıdy. Únemi kesh aldyndaǵy ýaıymymdy zalda meni kútip otyrǵan tyńdarmanym jaıly oımen basamyn. Kıeli ónerdi qurmettep, klassıkalyq mýzyka keshine keletin jandarǵa degen alǵysym zor, - deıdi Jánııa Áýbákirova. Óner ıesi dırıjer Dorıan Ýılsonmen seriktestiginiń anaý aıtqandaı uzaq bolmaǵanyn, alaıda az ýaqyt ishinde jemisti shyǵarmashylyq odaq qurǵanyn aıtady. - Ol Eýropada turady, búkil álem mýzykanttarymen jumys isteıdi. Dúnıe júzindegi úzdik operalyq teatrlardyń sahnasynda óner kórsetedi. Men bizdiń orkestr ártúrli dırıjerlik mánermen tanysýy kerek degen qaǵıdany ustanamyn. Mýzykanttarymyz ben stýdentterimiz tek Qazaqstanda ǵana emes, jalpy tórtkúl dúnıede ne bolyp jatqanyn kórý úshin biz únemi sheteldik áriptesterimizben tájirıbe almasýǵa tyrysamyz, - deıdi ol. Esterińizge sala ketsek, Jánııa Áýbákirova P.Chaıkovskıı atyndaǵy Máskeýdiń memlekettik konservatorııasyn jáne fortepıano synybynyń aspırantýrasyn professor L.Vlasenkonyń qolynan támamdady. 1983 jyly Margaret Long jáne Jak Tıbo halyqaralyq baıqaýynda Bas júlde jáne «Frantsýzdyq kompozıtorlardyń zamanaýı shyǵarmalaryn úzdik oryndaǵany úshin» arnaıy syılyqty ıelendi. Sondaı-aq 1985 jyly kameralyq ansamblderdiń halyqaralyq jarysynda Bas júldeni jeńip aldy.
