Parıj-2024: Jańyl Baltabaeva Paralımpıada oıyndaryna joldama jeńip aldy
ASTANA. KAZINFORM - Majarstannyń Seged qalasynda ótken para kanoedan lıtsenzııalyq álem chempıonatynda Jańyl Baltabaeva Parıj-2024 Paralımpıada oıyndaryna joldama jeńip aldy.
«Dene múmkindikteri shekteýli tulǵalarǵa arnalǵan sporttyq daıarlaý ortylyǵy» RMQK baspasóz qyzmeti tartqan aqparatqa qaraǵanda, chempıonattyń V fınalynda (VL3 klassy) óner kórsetken qazaqstandyq sportshy 200 m qashyqtyqty 1:05.83 sekýndta baǵyndyryp, márege ekinshi bolyp jetti. Osy básekede polshalyq Monıka Kýkla 1:05.45 sekýnd nátıjesimen birinshi, al frantsııalyq Elea Charvet 1:07.33 nátıjesimen úshinshi bolyp jetti.
«Parıj – 2024 Paralımpıada oıyndarynyń irikteý kezeńinde para kanoedan VL3 klasynda 10 joldama sarapqa salyndy. Onyń ishinde sońǵy tórt joldama osy álem chempıonatynda oınatyldy. Chempıonattyń fınaly A jáne V top arasynda ótti. A tobyna - aldynǵy lıtsenzııalyq týrnırlerde jeńiske jetken 6 sportshy jáne osy chempıonattyń jartylaı fınalynda úzdik óner kórsetken Ózbekstandyq sportshy irikteldi. Bizdiń sportshymyz Jańyl Baltabaeva V tobynda synǵa tústi. Márege birinshi bolyp jetken sportshydan tek 0,38 sekýndqa qalyp qoıdy. Jarystyń erejesine saı A tobynyń 7 sportshysy jáne V tobynyń 3 sportshysy Parıj-2024 Paralımpıada oıyndaryna joldama alady», - dedi Dene múmkindikteri shekteýli tulǵalarǵa arnalǵan sporttyq daıarlaý ortalyǵynyń komanda basshysy Ersultan Jolshıev.
Jańyl osymen Paralımpıada oıyndaryna elimizdiń 12-shi lıtsenzııasyn ıelendi. Buǵan deıin para kanoedan Spataı Bıbarys, para paýerlıftıngten Davıd Degtıarev, para jeńil atletıkadan Dastan Muqashbekov, voleıboldy otyryp oınaýdan ulttyq qurama, para oq atýdan Erkin Ǵabbasov, para júzýden úsh joldama, para taekvondodan Nurlan Dombaev, Kamılıa Dosmalova jáne Nyshan Ómiráli alǵan bolatyn.
Parıj-2024 Paralımpıada oıyndary tamyzdyń 28-i men 8-shi qyrkúıek aralyǵynda ótedi.
