Jánibek Jetirýovtyń «Aqqyz» fılmi Nıý-Delıdegi HІІ «Osian's-Cinefan kınofestıvaline qatysady
ALMATY. 5 shilde. QazAqparat - Shildeniń 27-si men tamyzdyń 5-i aralyǵynda Úndistannyń Nıý-Delı qalasynda «Úndi, Azııa jáne Arab kınofestıvali» ótedi. Oǵan Qazaqstannan Jánibek Jetirýovtyń «Aqqyz» fılmi shaqyrtý alyp otyr.
«Onda Úndi, Azııa jáne Arab elderiniń kıno ónerindegi ozyq úlgiler kórsetilip, talqylandy. «Aqqyz» baıqaýdyń negizgi baǵdarlamasyna enip otyr. Oǵan fılmniń prodıýseri Aldabek Shalbaev pen bas keıipker retinde aktrısa Aıjan Jetirova úsheýmiz baramyz. Alla buıyrsa aldaǵy ýaqytta elimizde ótetin «Eýrazııa» kınofestıvaline de qatyspaqpyz», - deıdi J. Jetirýov. 2011 jyly túsirilgen bul týyndy 16-30 qarasha kúnderi Estonııanyń Tallın qalasynda ótken XV Halyqaralyq «Qarańǵy túnder» kınofestıvaliniń negizgi baıqaý baǵdarlamasynda Eýrazııanyń úzdik 20 fılminiń qatarynda óner súıer qaýymnyń nazaryna usynylǵan bolatyn. Sonda qazylar alqasynyń múshesi bolǵan «Osian's-Cinefan» kınofestıvaliniń prezıdenti qazaqstandyq rejısserge Úndistandaǵy kınofestıvalderge qatysýǵa ótinish jasaǵan edi. Ótken aıdyń 18-i kúni arnaıy hat joldap, rejısserdiń kelisimin alǵan uıymdastyrýshylar endi resmı shaqyrtý jiberip otyr.
