Jánibek Jetirýovtyń «Aqqyz» fılmi HІІ Azııa elderiniń halyqaralyq Rım kınofestıvaline qatysady
ALMATY. 20 qyrkúıek. QazAqparat - Italııanyń Rım qalasynda 6-14 qazan kúnderi HІІ Azııa elderiniń halyqaralyq Rım kınofestıvali ótedi.
Dástúrli túrde jyl saıyn ótetin bul óner dodasynyń uıymdastyrýshylarynan Jánibek Jetirýovtyń «Aqqyz» fılmine shaqyrtý kelip otyr. Qazaqstandyq rejısser sondaı-aq, Azııanyń úzdik 4 rejısseriniń qatarynda 30 qyrkúıekten 6 qazanǵa deıin qysqa metrajdy fılm túsirýge tańdap alynǵan. Ol osy aralyqta óz stsenarııimen Italııanyń ataqty artısterin qatystyra otyryp, arnaıy fılm jasaýy tıis. Bul týyndy kınofestıtval kezinde óner súıer qaýymnyń nazaryna usynylmaq.
«Bıyl «Aqqyz» Úndistannyń Nıý-Delı qalasynda dástúrli túrde jyl saıyn ótetin «Úndi, Azııa jáne Arab kınofestıvaline» qatysty. Shildeniń 27-si men tamyzdyń 5-i aralyǵynda ótken bul básekede ol Qazaqstan atynan qatysqan tuńǵysh fılm boldy. Endi Italııadan bólek 15-20 qazanda Túrkııanyń Ankara qalasynda bolatyn 48-inshi «Altyn apelsın» kınofestıvalinde de kórsetilmek», - deıdi J. Jetirýov. Onyń aıtýynsha, «Aqqyz» bıyl Túrkııadaǵy «Altyn apelsınge» shaqyrtý alǵan qazaqstandyq 3 fılmniń biri bolmaq. Onda budan bólek Aqan Sataevtyń «Jaýjúrek myń bala» jáne Aktan Arym Kýbattyń «Jumaq analar úshin» fılmi de qatyspaq.
