Jánibek-Shalqar kesenesin turǵyzý úshin 50 myńnan astam kirpish kúıdirilgen
KÓKShETAÝ. QazAqparat - Aqmola oblysy ishki saıasat basqarmasynyń Óńirlik kommýnıkatsııalar qyzmeti «Týǵan jer» jobasy sheńberinde oblys aýmaǵynda ornalasqan tanymal tarıhı-sáýlet eskertkishterin BAQ betterinde jarııalaýdy jalǵastyrýda, dep habarlaıdy QazAqparat tilshisi.
Qazaq handyǵynyń negizin qalaýshylardyń biri - Jánibek-Shalqarǵa arnalǵan kesene XV ǵasyrda turǵyzylǵan. Tarıhı-sáýlet eskertkishi Astana qalasynan 100 shaqyrym qashyqtyqta Qorǵaljyn eldi mekeniniń mańynda ornalasqan. Ortaǵasyrlyq teńdessiz tarıhı eskertkishti sol kezde Orta Azııa elderinen kelgen sheberler men qolónershiler salǵan. Nysandy turǵyzý úshin arnaıy peshte 50 myńnan astam kirpish kúıdirilip, daıyndalǵan eken.
Kesene Nura ózeni arnasynyń tómen aǵasynda paıda bolǵan aǵyndy kóldiń ataýymen atalǵan. Qorym shoqynyń ústinde turǵyzylǵan, janynda qyr qustaryna baı dala ózenderi aǵyp jatyr. Jańa myńjyldyqta keseneni jergilikti ańshylardyń biri tapqan. Ǵalymdar bul jerden kógildir aqyqtan jasalǵan qysh taqtashalardy anyqtaǵan. Osyndaı materıalmen Qoja Ahmet ıAssaýı kesenesi men Samarqandtyń tarıhı bóligi qaptalǵan bolatyn.
2010 jyldary M. Habdýlınanyń jetekshiligimen Esil arheologııalyq ekspedıtsııasy ortaǵasyrlyq tarıhı sáýlet eskertkishin zerttedi. Ǵalymdar keseneni portaldy-kúmbezdi úlgige jatatynyn dáleldep otyr. Keseneniń aldyńǵy jaǵy zerlengen taqtamen, túrli ósimdik jáne geometrııalyq órnekterdiń oıýlanǵan úılesimimen bezendirilgen. Taqtalardyń keıbir túrleriniń shoǵyrlaný topografııasy olardyń kesene bezendirilýindegi ornalasqan oryndaryn boljaýǵa negiz beredi.
Eskertkish biregeı polıhromdy japqyshpen kómkerilgen eken, buny sol kezdegi tek aqsúıek adamdar ǵana jasata alatyn. Osy kúni Nura ózeniniń tómengi aǵysynda «Kereı», «Jánibek-Shalqar» jáne «Sultan keldi» tárizdi jer-sý ataýlary saqtalǵan. Bul ataýlar da Qazaq handyǵy qurylǵan dáýirde paıda bolǵanyn bildiredi.
