Jánibek Álimhanulynyń kásipqoı bokstaǵy ekinshi qarsylasy anyqtaldy
ASTANA.QazAqparat - «Qazaq promotions» kompanııasynyń baspasóz qyzmetiniń habarlaýynsha, Qazaqstandyq tanymal boksshy Jánibek Álimhanuly 9 qyrkúıekte Astanadaǵy kezekti jekpe-jeginde brazılııalyq Karmelıto de Jezýspen qolǵap túıistiredi.
Rıo Olımpıadasyndaǵy sátsizdikten keıin Jánibek Álimhanuly kásipqoı boksta ekinshi orta salmaqta baq synaýdy jón kórip, alǵashqy jekpe-jegin 2016 jyldyń qazan aıynda ótkizgen edi. Ol Almatyda Qanat Islamnyń qatysýymen ótken boks keshinde kolýmbııalyq Mılton Nýnesti tehnıkalyq nokaýtpen jeńdi.
Brazılııalyq boksshy kásipqoı rıngte 23 kezdesý ótkizip, 18-inde jeńiske jetken. Sondaı-aq, ol 15 jekpe-jeginde ýaqytynan buryn jeńiske jetip, 5 kezdesýde jeńilgen.
Aıta keteıik, jańa erejelerge sáıkes, kásipqoı bokstaǵy boksshylar AIBA-nyń álem chempıonattaryna jáne Olımpıada oıyndaryna qatysa alady. Degenmen, kásipqoı boks uıymdary óz chempıondaryn Olımpıada oıyndaryna qatysýǵa óz ruqsatyn bermeıtinin habarlaǵan bolatyn.
Eske salsaq, 9 qyrkúıekte Astanadaǵy «Saryarqa» velotregi ǵımaratynda Qanat Islam (24-0,19KO) kanadalyq Brendon Kýkpen (18-0, 11KO) judyryqtasady. Qanat birinshi orta salmaqtaǵy WBO NABO jáne WBA Inter-Continental chempıondyq ataqtaryn qorǵaıdy. Osy jekpe-jektiń anderkartynda 8 qazaqstandyq boksshy óner kórsetedi. Olar - Janqosh Turarov (21-0, 15KO), Jánibek Álimhanuly (1-0, 1KO), Meıirim Nursultanov (3-0,2KO), Rýslan Myrsataev (3-0, 3KO), Álı Ahmedov (7-0,5KO), Aıdos Erbosynuly (6-0, 6KO), Dımash Nııazov (11-0-3, 5KO) jáne Nursultan Jańabaev (2-0,1KO).
