Jánibek Álimhanulynyń qarsylasy - kolýmbııalyq «Jaýynger» týraly ne bilemiz

  ASTANA. QazAqparat - 28 qyrkúıek kúni qazaqstandyq kásipqoı boksshy Jánibek Álimhanuly Amerıkada alǵashqy jekpe-jegin ótkizedi. Sanaýly kúnderden keıingi aıqastyń aldynda QazAqparat oqyrmanǵa otandasymyzdyń qarsylasyn tanystyra ketýdi jón kórdi.

27 jastaǵy Karlos Galvannyń kásipqoı boksta júrgenine týra 7 jyl boldy. Kásipqoı rıngtegi debıýti 2011 jyly 30 qyrkúıekte boldy. Alǵashqy alty kezdesýin sátti ótkizip, qarsylastarynan basym túsken. Laqap aty - «El Guerrero» (maǵynasy - Jaýynger). Alaıda beti qaıtpaǵan boksshy jetinshi kezdesýinde óz otandasy Segýnda Herreromen teń túsip, segizinshi aıqasta reseılik Oleg Lıseevten utylyp qaldy. Osylaısha, barlyǵy 24 jekpe-jektiń 16-synda jeńiske jetip (15-i nokaýt), 7-de jeńildi, 1 ret teń tústi.

 Aıta keterligi, Karlos Galvan sońǵy jekpe-jegin osy jyldyń naýryzynda ótkizip, qazaqstandyq boksshy Gennadıı Golovkınniń burynǵy qarsylasy Vıllı Monromen aıqasqan. Kolýmbııalyqtyń jetinshi jeńilisi osy Monroǵa baılanysty. Eske sala ketsek, 2015 jyldyń mamyrynda Gennadıı Golovkın Kalıfornııa shtaty Inglvýd qalasyndaǵy «Forým» arenasynda amerıkalyq kishi Vıllı Monrony altynshy raýndta nokaýtqa jiberip, orta salmaqta sýperchempıondyq ataǵyn qorǵap qalǵan bolatyn.

Karlos Galvannyń Instagram paraqshasynda aıqasqa Qanat Islamnyń bapkeri kishi Nelson Djýnıormen daıyndalyp jatqanyn kórýge bolady.

Eske sala ketsek, Jánibek Álimhanuly (2-0-0,1KO) kásipqoı boksta eki jekpe-jek ótkizgen. Ekeýin de jeńispen aıaqtady, onyń birinde nokaýt bolsa, ekinshisi tóreshilerdiń sheshimimen berildi. Qazaqstandyq boksshynyń Amerıkadaǵy alǵashqy jekpe-jeginde kolýmbııalyqpen judyryqtasatynyn jazǵan bolatynbyz.

Boksshynyń Feısbkýktegi resmı paraqshasynda habarlanǵandaı, otandasymyz kásipqoı rıngtegi úshinshi kezdesýin 28 qyrkúıek kúni Kalıfornııa shtaty Oklend qalasynda ótkizedi.