Jánibek Álimhanulynyń qarsylasy anyqtaldy

ASTANA. QazAqparat – WBO nusqasy boıynsha orta salmaqtaǵy álem chempıony qazaqstandyq Jánibek Álimhanulynyń (13-0, 8 KO) kelesi jekpe-jegi ótetin kún men qarsylasy belgili boldy, dep habarlaıdy QazAqparat tilshisi.

Bul týraly Jánibek Álimhanulynyń menedjeri Berik Sultan óziniń Facebook paraqshasynda jazdy.

«Resmı! Buıyrtsa, jekpe-jek 13 mamyrda ótedi. Jánibek Álimhanuly WBO chempıondyq tıtýlyn ekinshi ret qorǵaıdy. Qarsylasy kanadalyq Stıven Batler. Jasy 27-de. Rekordy: 32 jeńis, 3 jeńilis. WBO reıtınginde 6 oryndaǵy qarsylas. Tartysty kezdesý kútip tur! Qazaq style-ǵa sáttilik! Jeńisti kúnde júzdeseıik!», - dep jazdy ol.

Eske sala keteıik, Jánibek eń sońǵy jekpe-jegin byltyr qarashada Las-Vegasta ótkizip, tóreshilerdiń sheshimimen brıtandyq boksshy Denzel Bentlıden basym tústi.

Sol arqyly WBO belbeýin qorǵap qaldy. Tıtýldyń ózi qazaqstandyqqa amerıkalyq boksshy Demetrıýs Andradeden «muragerlik jolmen» kelgen bolatyn.

Ol Álimhanulymen aıqasýdan bas tartyp, ekinshi orta dıvızıondaǵy mansabyn jalǵastyrýdy qup kórdi.