Jánibek Álimhanuly jyldyń úzdik boksshysy atandy
ASTANA. QazAqparat - Sporttyq jekpe-jekter jáne kúsh qoldanylatyn sport túrleri konfederatsııasy portaly www.confederation.kz otandyq BAQ jáne mamandar arasynda 2014 jylǵy Qazaqstandaǵy úzdik boksshyny anyqtaý maqsatynda saýalnama júrgizdi.
Onyń nátıjeleri boıynsha Jánibek Álimhanuly «Jyldyń úzdik boksshysy» atandy. «Azııa chempıony (2013), álem chempıony (2013), HVІІ Jazǵy Azııa oıyndarynyń (2014) jeńimpazy atanǵan Almaty oblysynyń Jylandy aýylynyń týmasy 21 jastaǵy Jánibek Álimhanuly bıik belesterdi baǵyndyrýdan tanbaýda! Inchhonda altyn medalǵa ıe bolýy onyń Almatydaǵy birinshilikte alǵashqy oryndy ıelenýi kezdeısoq emes ekendigin dáleldep, bul Murat Sıhymbaevtyń shákirti úshin dańǵyl jol ashty», delingen taratylǵan habarlamada. Sondaı-aq ótken jylmen salystyrǵanda, Jánibektiń kásibı sheberliginiń de shyńdala túskeni atalyp ótilgen. «Sonymen, J.Álimhanuly qazir Rıo-de-Janeırodaǵy Olımpıadaǵa ázirlik ústinde. Ol ózine bıik maqsat qoıyp otyr, endi sheginer jol joq...», dep naqtylanǵan konfederatsııa málimetinde.
