Jánibek Álimhanuly jekpe-jek aldynda jaraqat alyp qalǵan

NUR-SULTAN. QazAqparat – Orta salmaqtaǵy WBO belbeýiniń ıegeri Jánibek Álimhanulynyń menedjeri Berik Sultan óziniń youtube-arnasynda sportshynyń jekpe-jekke deıin alǵan jaraqaty týraly aıtty, dep habarlaıdy QazAqparat.

«Aıqasqa eki apta ýaqyt qaldy. Osy jekpe-jek bolmaı qalady-aý dep ýaıymdadym. Sparrıng kezinde Jánibek baýyrdan soqqy jasaý barysynda sol qolynyń saýsaǵyn qatty jaraqattap aldy. «Boldy, saýsaǵy syndy ǵoı» dep oıladym. Óıtkeni biz AQSh-qa alǵash ret kelgende, búıirden urǵan kezde, týra sol jerin syndyrǵan bolatyn, biz oǵan jeti myń dollarǵa ota jasattyq. Men jekpe-jektiń bolmaıtynyna 95%-ǵa senimdi boldym, tórt aı boıy biz AQSh-ta boldyq kóp jumys isteldi, qanshama ter tóktik, jekpe-jek kúzge aýysady-aý dep oıladym. Biraq qoly synbaǵan, sál aýyrtyp alǵan», — dedi menedjer Jánibek týraly derekti fılmde.

Eske sala keteıik, Jánibek Álimhanuly 22 mamyr kúni brıtandyq sportshy Dennı Dıgnýmdy nokaýtqa jiberip, orta salmaqta WBO tıtýlyn ıelengen bolatyn.