Jánibek Álimhanuly WBO jańa reıtınginde úzdik úshtikke endi

NUR-SULTAN. QazAqparat - Qazaqstandyq boksshy Jánibek Álimhanuly WBO reıtınginde úzdik úshtikten kórindi, dep habarlaıdy QazAqparat.

Bul jaıynda Qazaqstan kásipqoı boks qaýymdastyǵynyń áleýmettik jelidegi paraqshasynda jarııalandy.

Qazaqstandyq sportshy Búkilálemdik boks uıymynyń (WBO) 72,6 kelige deıingi orta salmaqtaǵy eń myqty úsh boksshysynyń biri atandy.

Buǵan deıin tórtinshi orynda turǵan ol joǵary jyljyp, úshinshi orynǵa jaıǵasty. Al osy pozıtsııada ornalasqan Qanat Islam bir saty tómendedi.

Eske sala keteıik, bir apta buryn Jánibek Álimhanuly Las-Vegasta (Nevada shtaty, AQSh) argentınalyq Gonsalo Korııany nokaýtpen jeńgen bolatyn.

Osylaısha 27 jastaǵy J.Álimhanuly kásipqoı bokstaǵy toǵyzynshy jeńisine qol jetkizip, WBO Global jáne WBC ContinentalAmericas tıtýldaryn qorǵap qaldy.