Jánibek Álimhanuly WBC reıtıngindegi úzdik 5 sportshynyń qataryna endi
NUR-SULTAN. QazAqparat – Qazaqstandyq boksshy Jánibek Álimhanuly (9-0, 5 KO) halyqaralyq WBC reıtıngindegi ornyn jaqsartty, dep habarlaıdy, QazAqparat Sports.kz portalyna silteme jasap.
WBC reıtınginiń jańartylǵan nusqasynda qazaqstandyq boksshy Jánibek Álimhanuly 72,6 kelige deıingi salmaq dárejesinde TOP-5 boksshynyń qataryna endi. Ótken aımen salystyrǵanda Jánibek bir satyǵa joǵarylap, reıtıngtiń besinshi qataryna kóterilgen. Reıtıngtiń kóshin burynǵysha Saýl Alvares bastap tur.
Eske sala ketsek, Álimhanuly orta salmaqtaǵy WBO Global chempıondyq belbeýiniń ıegeri. Ol óziniń sońǵy jekpe-jegin qyrkúıekte ótkizip, argentınalyq boksshy Gonsalo Korııany (16-4, 6 KO) ekinshi raýndta nokaýtpen jeńgen bolatyn.
