Jánibek Álimhanuly óz jankúıerlerine vıdeoúndeý jarııalady

ASTANA. QazAqparat – Kásipqoı bokstan WBO tujyrymy boıynsha álem chemıpony Jánibek Álimhanuly Instagram-paraqshasynda jankúıerlerine vıdeoúndeý jarııalady, dep habarlaıdy QazAqparat tilshisi.

«Búgin kishigirim serýen. Jattyǵý, bári oıdaǵydaı bolyp jatyr. Qudaı qalasa, qarashanyń 12-si kúni jekpe-jek. Qoldap jatqandaryńyzǵa kóp rahmet! Sizderdiń qoldaýlaryńyz bizge óte kerek. Qudaı qalasa, Qazaq Style-di álemge tanytaıyq, tarıh jasaıyq», - dedi Jánibek Álimhanuly.

Buǵan deıin qazaqstandyq boksshy Instagram-daǵy paraqshasynda: «Vegasta kóriskenshe! Kózildirik taǵyp kel, sebebi men rıngte jarqyraıtyn bolamyn. Qazaq Style», - dep, Bentlıge qarata jazba ornalastyrǵan bolatyn.

Eske salaıyq, Jánibek Álimhanuly bıylǵy 22 mamyrda brıtanııalyq Dennı Dıgnýmdy (14-0-1, 8 KO) ekinshi raýndta nokaýtqa túsirip, WBO nusqasy boıynsha orta salmaqta «ýaqytsha» chempıon atanǵan edi.

Keıin Amerıka boksshysy Demetrıýs Andrade J.Álimhanulymen mindetti jekpe-jekten bas tartty. Osyǵan baılanysty, qazaqstandyq boksshyǵa «ýaqytsha» chempıonnan orta salmaqtaǵy WBO nusqasy boıynsha tolyq quqyly álem chempıony mártebesi berildi.

Qazaqstandyq boksshyny QR Prezıdenti Qasym-Jomart Toqaev quttyqtady.

Al 3 qazan kúni Top Rank promoýterlik kompanııasy J.Álimhanuly – D.Bentlı jekpe-jegin resmı túrde jarııalady.

Foto: instagram.com/janibek_alimkhanuly/