Jánibek Álimhanuly men Denzel Bentlı erteńgi aıqas aldynda kóz arbasty

ASTANA. QazAqparat - Qazaqstandyq boksshy Jánibek Álimhanuly (12-0, 8 KO) men brıtandyq Denzel Bentlı (17-1-1, 14 KO) jekpe-jek aldynda salmaq ólshep, kóz túıistirdi, dep habarlaıdy QazAqparat Sports.kz resýrsyna silteme jasap.

Mindetti salmaq ólsheý protsedýrasynan keıin Álimhanuly men Bentlı sońǵy márte betpe-bet kezdesip, kóz arbasty.

Aldaǵy aıqasta Jánibek orta salmaqtaǵy WBO chempıony belbeýin qorǵaıdy. Bul - qazaqstandyq boksshy úshin birinshi tıtýldyq jekpe-jek.

Aıta keteıik, Top Rank promoýterlik kompanııasy J.Álimhanuly – D.Bentlı (17-1-1,14KO) jekpe-jegin resmı túrde jarııalaǵan bolatyn.

«Jeksenbi, 13 qarasha kúni Palms-tegi týrnırde álem chempıony ataǵy úshin eki jekpe-jek ótedi», - dep jazdy Top Rank Instagram-da.

Eske salaıyq, Jánibek Álimhanuly bıylǵy 22 mamyrda brıtanııalyq Dennı Dıgnýmdy (14-0-1, 8 KO) ekinshi raýndta nokaýtqa túsirip, WBO nusqasy boıynsha orta salmaqta «ýaqytsha» chempıon atanǵan edi.

Keıin Amerıka boksshysy Demetrıýs Andrade J.Álimhanulymen mindetti jekpe-jekten bas tartty. Osyǵan baılanysty, qazaqstandyq boksshyǵa «ýaqytsha» chempıonnan orta salmaqtaǵy WBO nusqasy boıynsha tolyq quqyly álem chempıony mártebesi berildi.

Álimhanuly – Bentlı aıqasy jeksenbi, 13 qarasha kúni tańerteń ótedi. Tikeleı kórsetilim «Habar» arnasynda astana ýaqytymen saǵat 08.00-de bastalady.