Jánibek Álimhanuly: Maǵan rıngte álsizderdiń keregi joq

ASTANA. QazAqparat - Qazaqstandyq kásipqoı boksshy Jánibek Álimhanuly 3 qarashada ótetin kezekti aıqasyna tas-túıin daıyn ekenin jarııa etti, dep habarlaıdy QazAqparat tilshisi.

«Myqtyny utsań ǵana myqty bolasyń. Myqtyny jeńgende ǵana chempıondyq belbeýge jaqyndaısyń. Maǵan rıngte álsizderdiń keregi joq. 3 qarasha kúni 13 jekpe-jeginiń 12-in utqan, tek 1 ǵana jekpe-jeginde tóreshilerdiń sheshimimen utylǵan Van Aleksandrmen judyryqtasamyn. Qazaq boks stılin 3 qarashada álem jankúıerlerine kórsetemiz», - dep jazdy Jánibek Álimhanuly óziniń Instagram paraqshasynda. 

Eske sala ketsek, Jánibek Álimhanulynyń kezekti qarsylasynyń kim ekenin, kásipqoı bokstaǵy dárejesi týraly buǵan deıin habarlaǵan bolatynbyz.

Aıta ketken jón, 29 qyrkúıekte Jánibek Álimhanuly (2-0, 1 KO) kásipqoı boks rıngindegi óziniń úshinshi jekpe-jegin jeńispen aıaqtaǵan bolatyn. AQSh-tyń Kalıfornııa shtatyndaǵy Oklend qalasynda kolýmbııalyq Karlos Galvanmen (16-7-1, 15 KO) kezdesýde otandasymyz tóreshilerdiń sheshimimen jeńiske jetken edi.