Jánibek Álimhanuly: Kásipqoı boksqa birjola aýyspaımyn
ASTANA. QazAqparat - Astanada ótetin Qanat Islam aıqasynyń anderkartynda Rıo-de Janeıro olımpıadasyna qatysýshy, álem chempıony Jánibek Álimhanuly da sharshy alańǵa shyǵady, dep habarlaıdy QazAqparat tilshisi.
Búgin boksshynyń ózine arnaıy qońyraý shalyp, jarysqa daıyndyǵy jaıynda qysqasha suhbat alǵan edik.
- Jánibek, kópten beri sharshy alańnan kórinbeı kettińiz...
- Iá, Rıo Olımpıadasynan keıin qysqa ýaqyt demaldyq. Odan keıin el birinshiligi ótti. Onda jańa salmaqta synǵa túsip el chempıony atandym. Odan keıin 29 qazan kúni Almatyda Qanat Islam men ganalyq boksshy Patrık Alloteıdyń jekpe-jegi aıasynda alǵashqy kásipqoı rıngtegi saıysymdy ótkizdim. Odan keıin densaýlyǵyma baılanysty em-dom qabyldap, demalys aldym.
- 9 qyrkúıek kúni taǵy da Qanat Islamnyń aıqasynyń anderkartynda óner kórsetedi dep estip jatyrmyz...
- Alla qalasa, sol kúni ekinshi ret kásipqoı bokstaǵy aıqasymdy ótkizsem dep josparlap júrmin.
- Qarsylasyńyz kim bolady?
- Ázirge áli belgisiz. Kimmen, qaı eldiń boksshysymen judyryqtasatynym jaqyn kúnderi belgili bolmaq.
- Belgisiz qarsylasqa daıyndyǵyńyz qalaı?
- Óte jaqsy daıyndyqtamyn. Kimmen bolsa da shyǵýǵa ázirmin. Qazir Almatyda Alataý bókterindegi boks bazasynda jattyǵyp jatyrmyn.
- Sonda birjola kásipqoı boksqa aýysyp jatyrsyz ba?
- Joq, birjola ketip jatqan joqpyn. Áli ulttyq qurama sapyndamyn. Áýesqoıda júrip, kásipqoı boks arqyly tájirıbe jınaýǵa bolady ǵoı. Bul men úshin aldaǵy úlken syndarǵa sabaq alatyn múmkindik. Sonymen qatar, EKSPO aıasynda ótetin úlken dodada óner kórsetý úlken mártebe. Biz osy arqyly qazaq jigitteriniń qandaı ekenin álemge pash etemiz.
- Áńgimeńizge rahmet! Sáttilik joldas bolsyn!
