Jánibek Álimhanuly qarsylasyn tehnıkalyq nokaýtpen utyp, Olımpıadaǵa joldama aldy
ASTANA. QazAqparat - Búgin Qytaıda bokstan Azııa jáne Muhıt aımaǵy elderi boıynsha Olımpıada oıyndaryna joldama beriletin týrnırdiń jartylaı fınaldyq básekeleri ótip jatyr.
Osydan birer sát buryn 75 keli salmaqta rıngke shyqqan qazaqstandyq boksshy Jánibek Álimhanuly mońǵolııalyq bylǵary qolǵap sheberi Shınebaıar Narmandahty tehnıkalyq nokaýtpen jeńip, fınalǵa shyqty.
Aıta keteıik, sheshýshi kezeńge shyqqan boksshylarǵa Olımpıada joldamasy beriledi. Osylaısha Jánibek Rıodaǵy baıraqty básekede el namysyn qorǵaýǵa múmkindik aldy.
Buǵan deıin 64 kelide Abylaıhan Júsipov qytaılyq boksshy Tsıanksýn Hýdy tize búktirip, fınalǵa shyqqan bolatyn. Al, 56 kelide óner kórsetken Qaırat Erálıev úndistandyq Shıva Tapaǵa jol bergen edi. Alaıda ol erteń, 1 sáýir kúni Marıo Fernandes (Fılıppın) - Chatchaı Býtdı (Taıland) jekpe-jeginde jeńilgen boksshymen joldamaǵa talasady.
